കൊച്ചി: ലക്ഷദ്വീപിലെ കൽപ്പേനി പോലീസ് സ്റ്റേഷനിൽ എൻ.എസ്.യു.ഐ (NSUI) സെക്രട്ടറി അഷ്ഹർ ഷബീബിനെതിരെ രജിസ്റ്റർ ചെയ്തിരുന്ന കേസ് കേരള ഹൈക്കോടതി റദ്ദാക്കി. ജസ്റ്റിസ് എ. ബദറുദ്ദീൻ അധ്യക്ഷനായ ബെഞ്ചാണ് ക്രൈം നമ്പർ 5/2026-ാം നമ്പറായി രജിസ്റ്റർ ചെയ്ത എഫ്.ഐ.ആറും അതിന്മേലുള്ള തുടർനടപടികളും പൂർണ്ണമായും റദ്ദാക്കിക്കൊണ്ട് ഉത്തരവ് പുറപ്പെടുവിച്ചത്. ഔദ്യോഗിക രേഖകൾ പരിശോധിക്കുമ്പോൾ, അടിസ്ഥാനരഹിതമായ ആരോപണങ്ങളുടെ പേരിലാണ് ഈ കേസ് രജിസ്റ്റർ ചെയ്തതെന്ന് വ്യക്തമാകുന്നതായി കോടതി പറഞ്ഞു.
എം.വി. കോറൽസ് കപ്പലിൽ സാധുവായ യാത്രാ ടിക്കറ്റില്ലാതെ യാത്ര ചെയ്തെന്നും, അഫ്ഷാൻ എന്ന വ്യക്തിയെ ഭീഷണിപ്പെടുത്തുകയും ആക്രമിക്കുകയും ചെയ്തു എന്നതുമായിരുന്നു അഷ്ഹറിനെതിരെയുള്ള ആരോപണം. എന്നാൽ, കേസ് രജിസ്റ്റർ ചെയ്യാൻ അടിസ്ഥാനമായ സ്പെഷ്യൽ റിപ്പോർട്ട് സമർപ്പിച്ച ഉദ്യോഗസ്ഥന് സംഭവത്തെക്കുറിച്ച് നേരിട്ട് യാതൊരു അറിവുമില്ലായിരുന്നുവെന്നും, കേവലം കേട്ടുകേൾവിയുടെ (Hearsay) മാത്രം അടിസ്ഥാനത്തിലാണ് റിപ്പോർട്ട് തയ്യാറാക്കിയതെന്നും ഹൈക്കോടതി ഉത്തരവിൽ വ്യക്തമായി ചൂണ്ടിക്കാണിക്കുന്നു. ടിക്കറ്റില്ലാതെ പൊതുഗതാഗത സംവിധാനമായ ഒരു കപ്പലിൽ യാത്ര ചെയ്തു എന്നത് കൊണ്ട് മാത്രം ഭാരതീയ ന്യായ സംഹിതയിലെ (BNS) ‘ഹൗസ് ട്രെസ്പാസ്’ (House-trespass) കുറ്റം നിലനിൽക്കില്ലെന്ന് നിയമപരമായ വകുപ്പുകൾ വിശകലനം ചെയ്തുകൊണ്ട് കോടതി വ്യക്തമാക്കുകയുണ്ടായി. കേസിൽ ചുമത്തിയിരുന്ന വകുപ്പുകൾ ഒന്നും തന്നെ പ്രഥമദൃഷ്ട്യാ നിലനിൽക്കുന്നതല്ലെന്ന് കോടതി നിരീക്ഷിച്ചു.
യാതൊരുവിധ അടിസ്ഥാനവുമില്ലാത്ത വിവരങ്ങളുടെ പേരിൽ, കൃത്യമായ അന്വേഷണമോ നിയമപരമായ മനസ്സിരുത്തലോ നടത്താതെ കേസെടുത്ത നടപടിയിൽ ഹൈക്കോടതി കടുത്ത അതൃപ്തി രേഖപ്പെടുത്തി. ഇത്തരം നടപടികൾ കോടതി മുൻപാകെയുള്ള നിയമപ്രക്രിയയുടെ ദുരുപയോഗമാണെന്ന് ചൂണ്ടിക്കാണിച്ച കോടതി, ഭാവിയിൽ നിരപരാധികളെ ഇത്തരം കേസുകളിൽ കുടുക്കാതിരിക്കാൻ കൃത്യമായ ജാഗ്രത പുലർത്തണമെന്ന് ലക്ഷദ്വീപ് പോലീസ് സൂപ്രണ്ടിനോട് (SP) നിർദ്ദേശിക്കുകയും ചെയ്തു.
