കോഴിക്കോട്: ബേപ്പൂരിൽ നിന്ന് ലക്ഷദ്വീപിലേക്കുള്ള യാത്രാക്ലേശത്തിന് പരിഹാരമായി പുതിയ സ്വകാര്യ കപ്പൽ സർവീസ് ഉടൻ ആരംഭിക്കുന്നു. തിരുച്ചിറപ്പള്ളി ആസ്ഥാനമായുള്ള ശുഭം ഫെറി എന്ന കമ്പനിക്കാണ് ഇതിനായി കേന്ദ്ര കപ്പൽ ഗതാഗത മന്ത്രാലയത്തിന്റെ അനുമതി ലഭിച്ചത്. ഇതുമായി ബന്ധപ്പെട്ട ഔദ്യോഗിക പ്രഖ്യാപനം ഡയറക്ടർ ജനറൽ ഓഫ് ഷിപ്പിംഗിന്റെ സാന്നിധ്യത്തിൽ കോഴിക്കോട് വെച്ച് നടക്കും. ആഴ്ചയിൽ ആറ് ദിവസം സർവീസ് ഉണ്ടായിരിക്കുമെന്ന് കമ്പനി ഉടമകൾ അറിയിച്ചു.
ചൈനയിൽ നിന്ന് ഇതിനായി വാങ്ങിയ അത്യാധുനിക സൗകര്യങ്ങളുള്ള ‘തേജ’ എന്ന കപ്പൽ നിലവിൽ തൂത്തുക്കുടിയിലേക്ക് യാത്ര തിരിച്ചിട്ടുണ്ട്. ഏകദേശം 220 പേർക്ക് ഒരേസമയം യാത്ര ചെയ്യാൻ സാധിക്കുന്ന ഈ കപ്പൽ, ബേപ്പൂരിൽ നിന്ന് ലക്ഷദ്വീപിലെ ആന്ത്രോത്ത് ദ്വീപിലേക്കാകും സർവീസ് നടത്തുക. കാലവർഷം കഴിഞ്ഞ് കടൽ ശാന്തമാകുന്നതോടെ സർവീസ് ആരംഭിക്കാനാണ് പദ്ധതി. ടിക്കറ്റ് നിരക്ക് ഏകദേശം 3000 രൂപയോളം വരും. യാത്രാസമയം അഞ്ച് മണിക്കൂറായി കുറയുമെന്നത് വലിയ നേട്ടമാണ്. ദ്വീപ് ഭരണകൂടം ബേപ്പൂരിലേക്ക് കപ്പലുകൾ അയക്കാൻ വിമുഖത കാട്ടിയിരുന്ന സാഹചര്യത്തിലാണ് ഈ പുതിയ സ്വകാര്യ സംരംഭം വരുന്നത്. ലക്ഷദ്വീപ് നിവാസികൾക്കും വിനോദസഞ്ചാരികൾക്കും ഒരുപോലെ ഗുണകരമാകുന്ന ഈ പദ്ധതി മേഖലയിലെ ടൂറിസം സാധ്യതകളും വർദ്ധിപ്പിക്കും.
കടപ്പാട്: മനോരമ ന്യൂസ്
