കവരത്തി: ലക്ഷദ്വീപിൽ വരും ദിവസങ്ങളിൽ ശക്തമായ കാറ്റിനും ഉയർന്ന തിരമാലകൾക്കും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പും (IMD) ഇന്ത്യൻ നാഷണൽ സെന്റർ ഫോർ ഓഷ്യൻ ഇൻഫർമേഷൻ സർവീസസും (INCOIS) മുന്നറിയിപ്പ് നൽകി. ഇതിന്റെ അടിസ്ഥാനത്തിൽ ലക്ഷദ്വീപ് ഭരണകൂടത്തിലെ ഡിസ്ട്രിക്റ്റ് ഡിസാസ്റ്റർ മാനേജ്മെന്റ് അതോറിറ്റി (DDMA) ജാഗ്രതാ നിർദ്ദേശം പുറപ്പെടുവിച്ചു. ജൂൺ 22 വരെയുള്ള ദിവസങ്ങളിൽ മണിക്കൂറിൽ 45 മുതൽ 55 കിലോമീറ്റർ വരെയും, ചില അവസരങ്ങളിൽ പരമാവധി 65 കിലോമീറ്റർ വരെയും വേഗതയിൽ ശക്തമായ കാറ്റ് വീശിയടിക്കാൻ സാധ്യതയുണ്ടെന്നാണ് കാലാവസ്ഥാ പ്രവചനം.
വിവിധ ദ്വീപുകളിൽ കടൽക്ഷോഭത്തിനും ഉയർന്ന തിരമാലകൾക്കും സാധ്യതയുള്ളതിനാൽ കടുത്ത ജാഗ്രതാ നിർദ്ദേശങ്ങളാണ് നൽകിയിരിക്കുന്നത്. അമിനി, കടമത്ത്, മിനിക്കോയ്, ചെത്ലാത്ത്, കിൽത്താൻ എന്നീ ദ്വീപുകളിൽ ജൂൺ 20 വരെ ‘ഓറഞ്ച് അലർട്ട്’ പ്രഖ്യാപിച്ചിട്ടുണ്ട്. ഈ പ്രദേശങ്ങളിൽ 1.1 മീറ്റർ മുതൽ 2.1 മീറ്റർ വരെ ഉയരത്തിൽ തിരമാലകൾ അടിച്ചുകയറാൻ സാധ്യതയുണ്ട്. അതേസമയം ആന്ത്രോത്ത്, അഗത്തി, കവരത്തി എന്നീ ദ്വീപുകളിൽ ‘യെല്ലോ അലർട്ട്’ ആണ് പ്രഖ്യാപിച്ചിരിക്കുന്നത്. ഇവിടെ 1.1 മീറ്റർ മുതൽ 2.2 മീറ്റർ വരെ ഉയരമുള്ള ശക്തമായ തിരമാലകൾക്ക് സാധ്യതയുണ്ടെന്ന് അധികൃതർ വ്യക്തമാക്കുന്നു. ബിത്ര, കൽപ്പേനി ദ്വീപുകളിൽ നിലവിൽ പ്രത്യേക അലർട്ടുകൾ ഒന്നും തന്നെ രേഖപ്പെടുത്തിയിട്ടില്ല.
വരുത്തിവെക്കാവുന്ന അപകടങ്ങൾ ഒഴിവാക്കുന്നതിനായി ലക്ഷദ്വീപ് ഭരണകൂടം കർശനമായ മുൻകരുതൽ നിർദ്ദേശങ്ങളാണ് പുറപ്പെടുവിച്ചിട്ടുള്ളത്. മുന്നറിയിപ്പ് കാലാവധി അവസാനിക്കുന്നത് വരെ മത്സ്യത്തൊഴിലാളികൾ യാതൊരു കാരണവശാലും കടലിൽ പോകരുതെന്ന് ഡിസാസ്റ്റർ മാനേജ്മെന്റ് അതോറിറ്റി കർശനമായി നിർദ്ദേശിക്കുന്നു. കടൽ പ്രക്ഷുബ്ധമാകാൻ സാധ്യതയുള്ളതിനാൽ ബോട്ട് സർവീസ് നടത്തുന്നവർ അതീവ ജാഗ്രത പാലിക്കണമെന്നും, യാത്രക്കാരുടെ സുരക്ഷ ഉറപ്പാക്കാൻ ബോട്ട് ഓപ്പറേഷൻ വേളകളിൽ ലൈഫ് ജാക്കറ്റുകളുടെ ഉപയോഗം നിർബന്ധമാക്കണമെന്നും നിർദ്ദേശമുണ്ട്. കൂടാതെ മോശം കാലാവസ്ഥ നിലനിൽക്കുന്നതിനാൽ പൊതുജനങ്ങളും വിനോദസഞ്ചാരികളും കടൽത്തീരങ്ങളിലെ വിനോദങ്ങളിൽ ഏർപ്പെടുന്നത് പൂർണ്ണമായും ഒഴിവാക്കണമെന്ന് അഡീഷണൽ ഡിസ്ട്രിക്റ്റ് മജിസ്ട്രേറ്റും ഡി.ഡി.എം.എ സി.ഇ.ഒയുമായ അവിനാഷ് സിംഗ് അറിയിച്ചു. ആവശ്യമായ നടപടികൾ സ്വീകരിക്കാൻ എല്ലാ ഡെപ്യൂട്ടി കളക്ടർമാർക്കും ബ്ലോക്ക് ഡെവലപ്മെന്റ് ഓഫീസർമാർക്കും നിർദ്ദേശം നൽകിയിട്ടുണ്ട്.
