മാലി: ഇന്ത്യയും മാലദ്വീപും തമ്മിലുള്ള നയതന്ത്ര ചർച്ചകളിൽ നിർണ്ണായകമായേക്കാവുന്ന പ്രസ്താവനയുമായി മാലദ്വീപ് മുൻ പ്രസിഡന്റ് അബ്ദുള്ള യമീൻ രംഗത്തെത്തിയിരിക്കുന്നു. ലക്ഷദ്വീപിന്റെ ഭാഗമായ മലിക്കു (മിനിക്കോയ് ദ്വീപ്) ചരിത്രപരമായി മാലദ്വീപിന്റേതാണെന്നും ഇന്ത്യയുടെ ഭാഗമായത് ചരിത്രപരമായ ചില പ്രത്യേക സാഹചര്യങ്ങൾ കൊണ്ടാണെന്നുമാണ് അദ്ദേഹം അഭിപ്രായപ്പെട്ടത്. പീപ്പിൾസ് നാഷണൽ ഫ്രണ്ട് (PNF) സംഘടിപ്പിച്ച യോഗത്തിൽ സംസാരിക്കുകയായിരുന്നു അദ്ദേഹം. ചാഗോസ് ദ്വീപസമൂഹത്തിന്മേലുള്ള അവകാശവാദങ്ങളെക്കുറിച്ച് ഇന്ത്യൻ മാധ്യമങ്ങളിൽ വന്ന ചർച്ചകൾക്ക് മറുപടിയായാണ് യമീൻ ഈ വിവാദ പരാമർശം നടത്തിയത്.
മലിക്കു മുതൽ അദ്ദു വരെ നീളുന്ന പ്രദേശം ഒരൊറ്റ രാജ്യമായാണ് ചരിത്രത്തിൽ അറിയപ്പെട്ടിരുന്നതെന്ന് യമീൻ ചൂണ്ടിക്കാട്ടി. ‘മലിക്കാടു അറ്റോൾ’ എന്നാണ് ഈ പ്രദേശം പണ്ട് അറിയപ്പെട്ടിരുന്നതെന്നും മാലദ്വീപിന്റെ ആദ്യകാല നാമങ്ങളിൽ ഇത് ഉൾപ്പെട്ടിരുന്നുവെന്നും അദ്ദേഹം അവകാശപ്പെട്ടു. പോർച്ചുഗീസ് അധിനിവേശത്തിനെതിരെയുള്ള പോരാട്ടങ്ങളുടെ ഭാഗമായി സുൽത്താൻ ഹസ്സൻ ഒമ്പതാമന്റെ ഭരണകാലത്താണ് മലിക്കു ഇന്ത്യയുടെ ഭാഗമായി മാറിയത്. അന്ന് ജനങ്ങളുടെ താൽപ്പര്യം മുൻനിർത്തി എടുത്ത തീരുമാനമായിരുന്നു ഇതെങ്കിലും, സാംസ്കാരികമായും വംശീയമായും മലിക്കുവിനുള്ള മാലദ്വീപ് ബന്ധം നിഷേധിക്കാനാവില്ലെന്ന് യമീൻ പറഞ്ഞു.
ദ്വീപിലെ ജനങ്ങൾ ഇന്നും സംസാരിക്കുന്നത് മാലദ്വീപിന്റെ ഔദ്യോഗിക ഭാഷയായ ധിവേഹിയാണെന്നത് ഈ ചരിത്ര ബന്ധത്തിന്റെ തെളിവായി അദ്ദേഹം അവതരിപ്പിച്ചു. പോർച്ചുഗീസ് കാലഘട്ടത്തിൽ മാലദ്വീപിന് നേരിടേണ്ടി വന്ന നാശനഷ്ടങ്ങൾക്ക് നഷ്ടപരിഹാരം ആവശ്യപ്പെടണമെന്നും അദ്ദേഹം കൂട്ടിച്ചേർത്തു. ഇന്ത്യ ഭരിക്കുന്ന മലിക്കുവിൽ ധിവേഹി ഭാഷ സംസാരിക്കപ്പെടുന്നുണ്ടെന്ന് ഇന്ത്യൻ മാധ്യമങ്ങൾ സമ്മതിക്കുന്നുണ്ടെങ്കിലും, അതിന്റെ പിന്നിലെ ചരിത്രപരമായ കാരണങ്ങൾ അവർ ചർച്ച ചെയ്യുന്നില്ലെന്നും അദ്ദേഹം കുറ്റപ്പെടുത്തി.
മാലദ്വീപിന്റെ ചരിത്രത്തിലെ കറുത്ത അധ്യായമായാണ് മലിക്കു നഷ്ടപ്പെട്ടതിനെ യമീൻ വിശേഷിപ്പിച്ചത്. പോർച്ചുഗീസ് അധിനിവേശത്തെ ചെറുത്ത ബോദു താക്കൂർഫാനുവിന്റെ കുടുംബം മലിക്കുവിൽ അഭയം തേടിയിരുന്നതായും അദ്ദേഹത്തിന്റെ മകൻ കാലാഫാനു വളർന്നത് അവിടെയാണെന്നും ചരിത്രരേഖകൾ വ്യക്തമാക്കുന്നുണ്ട്. ദ്വീപിൽ ഇപ്പോഴും നിലനിൽക്കുന്ന ‘ധിവേഹി ഗണ്ഡുവാറു’ (Dhivehi Ganduwaru) ഇതിന്റെ അടയാളമാണെന്ന് അദ്ദേഹം ഓർമ്മിപ്പിച്ചു. ഇന്ത്യൻ നയതന്ത്ര ഉദ്യോഗസ്ഥർ പങ്കെടുത്ത ചടങ്ങിലാണ് യാമീൻ ഈ പ്രസ്താവനകൾ നടത്തിയത് എന്നത് വിഷയത്തിന്റെ ഗൗരവം വർദ്ധിപ്പിക്കുന്നു.
