കൊച്ചി: ലക്ഷദ്വീപിലെ പരമ്പരാഗത ട്യൂണ (ചൂര) മത്സ്യബന്ധന മേഖലയ്ക്ക് ആഗോള വിപണിയിൽ വൻ സ്വീകാര്യത ലഭിക്കുന്നു. അമേരിക്ക, തായ്ലൻഡ്, ദക്ഷിണ കൊറിയ, മാൽദ്വീപ്, വിയറ്റ്നാം, ഓസ്ട്രിയ എന്നിവിടങ്ങളിൽ നിന്നുള്ള സമുദ്രോൽപ്പന്ന വ്യാപാരികളും വിദഗ്ധരും അടങ്ങുന്ന എട്ടംഗ സംഘം ലക്ഷദ്വീപിൽ സന്ദർശനം നടത്തി. ദ്വീപ് സമൂഹങ്ങളിൽ നിന്നുള്ള ട്യൂണ കയറ്റുമതിയുടെ സാധ്യതകൾ വിലയിരുത്തുകയായിരുന്നു സന്ദർശനത്തിന്റെ പ്രധാന ലക്ഷ്യം. ലോജിസ്റ്റിക്സ് പരിമിതികളും വിപണിയിലേക്കുള്ള പ്രവേശനമില്ലായ്മയും കാരണം ഇതുവരെ തളർന്നു കിടന്നിരുന്ന ദ്വീപിന്റെ മൽസ്യസമ്പദ്വ്യവസ്ഥയ്ക്ക് ഈ സന്ദർശനം പുതിയൊരു വഴിത്തിരിവാകുമെന്ന് കരുതപ്പെടുന്നു.
കവരത്തി, അഗത്തി, മിനിക്കോയ്, ആന്ദ്രോത്ത് തുടങ്ങിയ പ്രധാന ദ്വീപുകൾ സന്ദർശിച്ച പ്രതിനിധി സംഘം പ്രാദേശിക മത്സ്യത്തൊഴിലാളികളുമായും സൊസൈറ്റികളുമായും സംരംഭകരുമായും ചർച്ചകൾ നടത്തി. ലക്ഷദ്വീപിലെ ‘പോൾ ആൻഡ് ലൈൻ’ (Pole-and-line) എന്ന പരിസ്ഥിതി സൗഹൃദ മീൻപിടുത്ത രീതിയാണ് അന്താരാഷ്ട്ര തലത്തിൽ ശ്രദ്ധിക്കപ്പെടുന്നത്. ഇത്തരത്തിൽ പിടിക്കുന്ന മീനുകൾക്ക് ഉയർന്ന ഗുണമേന്മയുള്ളതിനാലും സമുദ്ര പരിസ്ഥിതിക്ക് കോട്ടം തട്ടാത്തതിനാലും യൂറോപ്പ്, വടക്കേ അമേരിക്ക, കിഴക്കൻ ഏഷ്യൻ വിപണികളിൽ വൻ ഡിമാൻഡാണുള്ളത്. പച്ചയായ ട്യൂണയ്ക്ക് പുറമെ ഫ്രോസൺ ലോയിൻ, റെഡി ടു കുക്ക് ഉൽപ്പന്നങ്ങൾ, പരമ്പരാഗത ഉണക്കമീനായ ‘മാസ്മിൻ’ എന്നിവ കയറ്റുമതി ചെയ്യുന്നതിലും സംഘം താൽപ്പര്യം പ്രകടിപ്പിച്ചു.
നൂതന ശീതീകരണ സംവിധാനങ്ങളുള്ള ‘മദർ വെസ്സലുകൾ’ (Mother Vessels) വിന്യസിക്കുന്നതാണ് നിർദ്ദിഷ്ട ബിസിനസ് മോഡലിന്റെ പ്രധാന ആകർഷണം. കടലിൽ വെച്ചുതന്നെ മീനുകൾ ശാസ്ത്രീയമായി കൈകാര്യം ചെയ്യാനും ഗുണനിലവാരം ഉറപ്പാക്കാനും ഈ കപ്പലുകൾ സഹായിക്കും. ഇത് മീനുകൾ കേടായിപ്പോകുന്നത് ഒഴിവാക്കാനും മത്സ്യത്തൊഴിലാളികൾക്ക് മികച്ച വില ഉറപ്പാക്കാനും സഹായിക്കുമെന്ന് സംഘം വിലയിരുത്തി. കൂടാതെ, കയറ്റുമതി നടപടിക്രമങ്ങൾ ലഘൂകരിക്കുന്നതിനെക്കുറിച്ച് സംഘം ലക്ഷദ്വീപ് ഭരണകൂടവുമായും ഫിഷറീസ് വകുപ്പുമായും ചർച്ചകൾ നടത്തിയിട്ടുണ്ട്.
തായ്ലൻഡ് ആസ്ഥാനമായുള്ള എൻ.എസ്. സീഫുഡ്സിലെ ജയേന്ദ്രൻ മുത്തുശങ്കറിന്റെ നേതൃത്വത്തിൽ ആന്ദ്രോത്ത് ഐലൻഡ് ഫിഷർമെൻ കോഓപ്പറേറ്റീവ് സൊസൈറ്റിയാണ് ഈ സന്ദർശനം ഏകോപിപ്പിച്ചത്. ഉത്തരവാദിത്തമുള്ള മത്സ്യബന്ധന രീതികളും ഉൽപ്പന്നത്തിന്റെ മികച്ച ഗുണനിലവാരവും ലക്ഷദ്വീപിനെ ട്യൂണ കയറ്റുമതിയുടെ കേന്ദ്രമാക്കാൻ സഹായിക്കുമെന്ന് ജയേന്ദ്രൻ മുത്തുശങ്കർ അഭിപ്രായപ്പെട്ടു. അന്താരാഷ്ട്ര പങ്കാളിത്തം ഉറപ്പാക്കുന്നതിലൂടെ ദ്വീപിലെ മത്സ്യത്തൊഴിലാളികളുടെ ഉപജീവനമാർഗ്ഗം മെച്ചപ്പെടുമെന്നും സംസ്കരണ മേഖലയിൽ കൂടുതൽ നിക്ഷേപങ്ങൾ എത്തുമെന്നും സൊസൈറ്റി പ്രസിഡന്റ് മുഹമ്മദ് അൽത്താഫ് ഹുസൈൻ പ്രത്യാശ പ്രകടിപ്പിച്ചു.
