കവരത്തി: ലക്ഷദ്വീപിന്റെ ആരോഗ്യരംഗത്ത് പുതിയൊരു ചരിത്രം കുറിച്ച് കവരത്തിയിലെ ഇന്ദിരാഗാന്ധി ഹോസ്പിറ്റൽ (IGH). ദ്വീപിന്റെ ചരിത്രത്തിലാദ്യമായി ഒരു ‘ടോട്ടൽ തൈറോയിഡെക്ടമി’ (Total Thyroidectomy) ശസ്ത്രക്രിയ വിജയകരമായി പൂർത്തിയാക്കി ഐ.ജി.എച്ച് കവരത്തി ഒരു പുതിയ നാഴികക്കല്ല് പിന്നിട്ടിരിക്കുകയാണ്.
കഴിഞ്ഞ ഏഴ് വർഷമായി തൈറോയ്ഡ് ഗ്രന്ഥിയുടെ വീക്കം മൂലം ബുദ്ധിമുട്ടിയിരുന്ന 39 വയസ്സുകാരിയായ സ്വദേശിനിക്കാണ് ഈ നൂതന ശസ്ത്രക്രിയ നടത്തിയത്. സാധാരണയായി ഇത്തരം സങ്കീർണ്ണമായ ശസ്ത്രക്രിയകൾക്കായി രോഗികളെ കൊച്ചിയിലെ മൾട്ടി സ്പെഷ്യാലിറ്റി ആശുപത്രികളിലേക്കാണ് റഫർ ചെയ്യാറുള്ളത്. ഇത് രോഗികൾക്കും അവരുടെ കുടുംബങ്ങൾക്കും വലിയ സാമ്പത്തിക ബാധ്യതയും യാത്ര ക്ലേശവും ഉണ്ടാക്കിയിരുന്നു. എന്നാൽ ദ്വീപിൽ തന്നെ ഈ സൗകര്യം ഒരുങ്ങിയതോടെ ഇതിന് പരിഹാരമായിരിക്കുകയാണ്.
നേതൃത്വം നൽകിയ വിദഗ്ധ സംഘം
സർജൻ ഡോ. മുബീനയുടെ നേതൃത്വത്തിലുള്ള മെഡിക്കൽ സംഘമാണ് ഈ വിജയകരമായ ശസ്ത്രക്രിയയ്ക്ക് പിന്നിൽ. അനസ്തേഷ്യ വിഭാഗം വിദഗ്ധൻ ഡോ. സാദ് ആലം, നാഷണൽ ഫ്ലോറൻസ് നൈറ്റിംഗേൽ അവാർഡ് ജേതാവും സീനിയർ തിയേറ്റർ നഴ്സുമായ ശ്രീമതി ഹിന്ദുമ്പി കെ.കെ, നഴ്സിംഗ് ഓഫീസർ മുബീന കെ.കെ, അനസ്തേഷ്യ ടെക്നീഷ്യൻ സുഹ്റ തസ്ലീന എന്നിവർ അടങ്ങുന്ന സംഘത്തിന്റെ കൂട്ടായ പ്രവർത്തനമാണ് ഈ ചരിത്ര നേട്ടത്തിന് വഴിതെളിച്ചത്.
ലക്ഷദ്വീപ് ആരോഗ്യവകുപ്പിന്റെ പ്രവർത്തനങ്ങളിൽ ലഭിച്ച വലിയൊരു അംഗീകാരമായാണ് ഈ നേട്ടം വിലയിരുത്തപ്പെടുന്നത്. ദ്വീപ് നിവാസികൾക്ക് വിദഗ്ധ ചികിത്സ സ്വന്തം നാട്ടിൽ തന്നെ ലഭ്യമാക്കുന്നതിലൂടെ ആരോഗ്യമേഖലയിലെ അടിസ്ഥാന സൗകര്യങ്ങളുടെ പുരോഗതിയാണ് ഇത് വെളിപ്പെടുത്തുന്നത്.
ഹിസ്റ്റോപാത്തോളജിക്കൽ പരിശോധനകൾ ഉൾപ്പെടെയുള്ള തുടർ ചികിത്സകൾ ഇനി ദ്വീപിൽ തന്നെ കൂടുതൽ കാര്യക്ഷമമായി ലഭ്യമാക്കാൻ സാധിക്കുമെന്ന് ആരോഗ്യവകുപ്പ് അധികൃതർ അറിയിച്ചു.
