കൽപ്പേനി: ലക്ഷദ്വീപിന്റെ കായിക മാമാങ്കത്തിന് കൽപേനിയിൽ പ്രൗഢോജ്ജ്വല തുടക്കം. ഗവൺമെന്റ് സർദാർ പട്ടേൽ സീനിയർ സെക്കൻഡറി സ്കൂളിൽ വെച്ച് ആരംഭിച്ച മുപ്പത്തിയഞ്ചാമത് ലക്ഷദ്വീപ് സ്കൂൾ ഗെയിംസ് 2026 കൽപേനി ദ്വീപിൽ വർണാഭമായ ചടങ്ങുകളോടെയാണ് ഉദ്ഘാടനം ചെയ്യപ്പെട്ടത്. വിദ്യാർത്ഥികളിലെ കായിക പ്രതിഭകളെയും ഒത്തൊരുമയും കായികക്ഷമതയും പ്രോത്സാഹിപ്പിക്കുന്നതിനായി സംഘടിപ്പിച്ചിരിക്കുന്ന ഈ വിനോദോത്സവം ദ്വീപ് നിവാസികൾക്കും കായികപ്രേമികൾക്കും വലിയ ആവേശമാണ് സമ്മാനിച്ചിരിക്കുന്നത്.
വിദ്യാഭ്യാസ-കായിക യുവജനകാര്യ വകുപ്പ് സെക്രട്ടറിയും ചടങ്ങിന്റെ മുഖ്യാതിഥിയുമായ ശ്രീ. ജിതേന്ദർ യാദവ് ഐ.എ.എസ്. കായികമേള ഔദ്യോഗികമായി ഉദ്ഘാടനം ചെയ്യുകയും കായികമേളയുടെ ദീപശിഖ പ്രയാണം അടക്കമുള്ള ചടങ്ങുകൾക്ക് നേതൃത്വം നൽകുകയും ചെയ്തു. ലക്ഷദ്വീപ് അഡ്മിനിസ്ട്രേഷന്റെയും വിവിധ വകുപ്പുകളുടെയും മേൽനോട്ടത്തിൽ നടക്കുന്ന ഈ മഹാമേളയിൽ ദ്വീപുകളിലെ വിവിധ സ്കൂളുകളിൽ നിന്നുള്ള യുവ പ്രതിഭകൾ തങ്ങളുടെ കായിക മികവ് തെളിയിക്കാൻ അണിനിരക്കുന്നുണ്ട്.
ചടങ്ങിൽ വിദ്യാഭ്യാസം, കായികം എന്നീ വകുപ്പുകളുടെ ഡയറക്ടർ ശ്രീ. അവിനാഷ് സിംഗ് ഡാനിക്സ് സ്വാഗതമാശംസിക്കുകയും, റവന്യൂ-ദുരന്തനിവാരണ സെക്രട്ടറി ഡോ. ഗിരി ശങ്കർ ഐ.എ.എസ്., വിദ്യാഭ്യാസ ഓഫീസർ ശ്രീമതി സുബൈദാബി സി.പി. തുടങ്ങിയ പ്രമുഖർ ആശംസകൾ അർപ്പിച്ച് സംസാരിക്കുകയും ചെയ്തു. കായികമേളയുടെ സംഘാടകസമിതി ചെയർപേഴ്സണും പ്രിൻസിപ്പലുമായ ശ്രീമതി സഫിയ സി.ഒ. നന്ദി രേഖപ്പെടുത്തിയ ചടങ്ങിൽ വിവിധ സാംസ്കാരിക പരിപാടികളും കുട്ടികളുടെ മാർച്ച് പാസ്റ്റും അരങ്ങേറി. ‘ഡെയർ ടു ഡോമിനേറ്റ്’ (Dare to Dominate) എന്ന പ്രമേയത്തിൽ നടക്കുന്ന ഈ പതിപ്പ് ദ്വീപിലെ കായികരംഗത്ത് പുതിയ ചരിത്രമെഴുതുമെന്നാണ് പ്രതീക്ഷിക്കുന്നത്.
