കവരത്തി: ‘അതിജീവനത്തിന്റെ വേരും വാക്കും’ എന്ന പ്രമേയത്തിൽ നടന്ന എസ്.എസ്.എഫ്. ലക്ഷദ്വീപ് സാഹിത്യോത്സവം സമാപിച്ചു. വാശിയേറിയ മത്സരങ്ങൾക്കൊടുവിൽ ഏറ്റവും കൂടുതൽ പോയിന്റുകൾ നേടി ആന്ത്രോത്ത് ദ്വീപ് ഓവറോൾ ചാമ്പ്യൻഷിപ്പ് കരസ്ഥമാക്കി.
ചെത്ലത്ത് ദ്വീപാണ് രണ്ടാം സ്ഥാനത്ത് എത്തിയത്. അമിനി ദ്വീപിനാണ് മൂന്നാം സ്ഥാനം.
സാഹിത്യോത്സവത്തിൽ എട്ട് ദ്വീപുകളിൽ നിന്നായി 50-ൽ അധികം മത്സരങ്ങളിൽ നിന്ന് 400-ൽ അധികം മത്സരാർത്ഥികൾ പങ്കെടുത്തു. ഫാമിലി, യൂണിറ്റ് മത്സരങ്ങൾക്ക് ശേഷം ഡിവിഷൻ തലത്തിൽ ഒന്നാം സ്ഥാനം നേടിയ പ്രതിഭകളാണ് സംസ്ഥാന തലത്തിൽ മാറ്റുരച്ചത്.
സെപ്റ്റംബർ 22 മുതൽ ചെത്ലത്ത് ദ്വീപിൽ മത്സര ഇതര പ്രോഗ്രാമുകൾക്ക് തുടക്കമായിരുന്നു. എന്നാൽ, പ്രതികൂല കാലാവസ്ഥ കാരണം മത്സരപരിപാടികൾ ഓൺലൈൻ ആയാണ് സംഘടിപ്പിച്ചത്.
കവരത്തിയിൽ നടന്ന സമാപന ചടങ്ങ് പ്രശസ്ത സാഹിത്യകാരൻ ഹംസകോയ മാസ്റ്റർ ഉദ്ഘാടനം ചെയ്തു. എസ്.എസ്.എഫ്. ലക്ഷദ്വീപ് സ്റ്റേറ്റ് കമ്മിറ്റി ഭാരവാഹികളായ അബ്ദുൽ ഗഫൂർ, ഖലീൽ മിസ്ബാഹി, അബ്ദുൽ ഗനി, എസ്.വൈ.എസ്. (SYS) ലക്ഷദ്വീപ് ജില്ലാ സെക്രട്ടറി ഹാഷിം അഹ്സനി തുടങ്ങിയവർ ചടങ്ങിൽ സംസാരിച്ചു. വിജയികൾക്കുള്ള സമ്മാനദാനത്തോടെ പരിപാടികൾ അവസാനിച്ചു.
