കവരത്തി: ലക്ഷദ്വീപ് ഭരണകൂടത്തിന്റെ കീഴിലുള്ള പോർട്ട്, ഷിപ്പിംഗ് & ഏവിയേഷൻ വകുപ്പ് കപ്പൽ യാത്രക്കാർക്കുള്ള ടിക്കറ്റ് ബുക്കിങ്ങിനായി പുതിയ ഓൺലൈൻ ടിക്കറ്റ് ബുക്കിങ് സംവിധാനം 2025 ഡിസംബർ 5 മുതൽ പ്രവർത്തനക്ഷമമാകും.
എല്ലാ യാത്രക്കപ്പലുകളിലെയും ടിക്കറ്റുകൾ ഇനിമുതൽ www.lakshadweep.irctc.co.in എന്ന പുതിയ പോർട്ടൽ വഴിയായിരിക്കും ലഭ്യമാവുക.
ഡിസംബർ 14 മുതലുള്ള കപ്പൽ യാത്രകൾക്കുള്ള ടിക്കറ്റുകളാണ് പുതിയ സംവിധാനം വഴി ആദ്യം പുറത്തിറങ്ങുക.
യാത്രാ ടിക്കറ്റിങ് പുതിയ പോർട്ടലിലേക്ക് മാറുമ്പോൾ, കാർഗോ ബുക്കിങ് (ചരക്ക് ടിക്കറ്റിങ്) നിലവിലെ എൻ.ഐ.സി (NIC) പോർട്ടൽ വഴി തന്നെ തുടരുമെന്നും നോട്ടീസിൽ വ്യക്തമാക്കുന്നു.
പോർട്ട്, ഷിപ്പിംഗ് & ഏവിയേഷൻ ഡയറക്ടർ ഡോ. ആർ. ഗിരി ശങ്കർ (ഐ.എ.എസ്) ആണ് ഇതുസംബന്ധിച്ച അറിയിപ്പ് പുറത്തിറക്കിയത്. പുതിയ മാറ്റം യാത്രക്കാർക്ക് ടിക്കറ്റ് ബുക്കിങ് കൂടുതൽ എളുപ്പമാക്കുമെന്നാണ് പ്രതീക്ഷിക്കുന്നത്.
