കടമത്ത്: 2026-ലെ വിശുദ്ധ ഹജ്ജ് കർമ്മത്തിനായി പുറപ്പെടുന്ന കടമത്ത് ദ്വീപിലെ തീർത്ഥാടകർക്ക് സിൽവർ സാൻഡ് ക്രിക്കറ്റ് ക്ലബ്ബിന്റെ ആഭിമുഖ്യത്തിൽ ഊഷ്മളമായ യാത്രയയപ്പ് നൽകി. കടമത്ത് ഖാസിയുടെ നേതൃത്വത്തിൽ നടന്ന പ്രത്യേക പ്രാർത്ഥനയോടെയാണ് ചടങ്ങുകൾക്ക് തുടക്കമായത്. ദ്വീപിലെ സാമൂഹിക-സാംസ്കാരിക മേഖലകളിൽ സജീവ സാന്നിധ്യമായ ക്ലബ്ബ് അംഗങ്ങൾ, തീർത്ഥാടകരുടെ വീടുകളിൽ നേരിട്ടെത്തി ലഗേജുകൾ കപ്പലിൽ എത്തിച്ചു നൽകുന്നതുൾപ്പെടെയുള്ള സന്നദ്ധ സേവനങ്ങൾക്ക് നേതൃത്വം നൽകി.
യാത്രയയപ്പ് ചടങ്ങിൽ കടമത്ത് ഖാസി ബി.സി. ഹാമിദ് മുസ്ലിയാർ, ലക്ഷദ്വീപ് ഖാദി ആൻഡ് വില്ലേജ് ഇൻഡസ്ട്രീസ് ബോർഡ് എക്സിക്യൂട്ടീവ് ഓഫീസർ റഫീഖ് ടി.കെ, ഹജ്ജ് ട്രെയിനർ എസ്.എം. അബ്ദുൽ ഗഫൂർ എന്നിവരും ക്ലബ്ബ് ഭാരവാഹികളും ചേർന്ന് തീർത്ഥാടകരെ ആദരിച്ചു. അല്ലാഹുവിന്റെ അതിഥികളായി പുണ്യഭൂമിയിലേക്ക് പോകുന്നവർക്ക് സേവനം ചെയ്യാൻ സാധിച്ചത് വലിയൊരു ഭാഗ്യമായി കരുതുന്നുവെന്ന് ക്ലബ്ബ് പ്രതിനിധികൾ ചടങ്ങിൽ പറഞ്ഞു. ദ്വീപ് നിവാസികളുടെയും ലോക മുസ്ലീങ്ങളുടെയും ഐശ്വര്യത്തിനും സമാധാനത്തിനുമായി പ്രാർത്ഥിക്കണമെന്ന് തീർത്ഥാടകരോട് അവർ അഭ്യർത്ഥിച്ചു. വിഭവസമൃദ്ധമായ സൽക്കാരവും സ്നേഹോപഹാരങ്ങളും നൽകിയാണ് ക്ലബ്ബ് അംഗങ്ങൾ ഹാജിമാരെ യാത്രയാക്കിയത്. ദ്വീപിലെ പ്രമുഖ വ്യക്തിത്വങ്ങളും നാട്ടുകാരും പങ്കെടുത്ത ചടങ്ങിൽ, യുവാക്കളുടെ ഈ മാതൃകാപരമായ സന്നദ്ധപ്രവർത്തനത്തെയും ആതിഥ്യമര്യാദയെയും നാട്ടുകാർ ഒന്നടങ്കം അഭിനന്ദിച്ചു.
