കൊച്ചി: 1987-88 വർഷത്തിൻ്റെ അവസാനത്തിൽ അന്നത്തെ പ്രധാനമന്ത്രി രാജീവ് ഗാന്ധിയും കുടുംബവും ലക്ഷദ്വീപിൽ നടത്തിയ സ്വകാര്യ അവധിക്കാലം, രാജ്യത്തിൻ്റെ രാഷ്ട്രീയ-പ്രതിരോധ തലങ്ങളിൽ സൃഷ്ടിച്ച കോളിളക്കം ഒരുപാടാണ്. പ്രധാനമന്ത്രിയുടെ സ്വകാര്യ യാത്രയ്ക്കുവേണ്ടി രാജ്യത്തിൻ്റെ യുദ്ധക്കപ്പലും മറ്റ് പ്രതിരോധ സംവിധാനങ്ങളും ഉപയോഗിച്ചു എന്നതായിരുന്നു അന്നത്തെ പ്രധാന വിമർശനം. ഈ വിവാദങ്ങളെല്ലാം ഉൾപ്പെടുത്തി ഇന്ത്യ ടുഡേ മാഗസിൻ 1988 ജനുവരി 31-ന് പ്രസിദ്ധീകരിച്ച റിപ്പോർട്ട് ഇപ്പോൾ വീണ്ടും ഇന്ത്യാ ടുഡേ ഓൺലൈനിൽ പുനഃപ്രസിദ്ധീകരിച്ചിരിക്കുകയാണ്.
രാഷ്ട്രീയ തിരക്കുകളിൽ നിന്നും കുടുംബവുമായി അവധി ആഘോഷിക്കാൻ രാജീവ് ഗാന്ധി തിരഞ്ഞെടുത്തത്, കൊച്ചിയിൽ നിന്ന് 465 കിലോമീറ്റർ പടിഞ്ഞാറ് അറബിക്കടലിൽ സ്ഥിതി ചെയ്യുന്ന, ജനവാസമില്ലാത്ത ബംഗാരം ദ്വീപായിരുന്നു (വിസ്തീർണ്ണം 0.5 ചതുരശ്ര കിലോമീറ്റർ). ലക്ഷദ്വീപിലെ 36 ദ്വീപുകളിൽ വിദേശികൾക്ക് പ്രവേശനവിലക്കില്ലാത്ത ഏക ദ്വീപും, മദ്യനിരോധനം ഇല്ലാത്ത ഒരേയൊരിടവും ബംഗാരമാണ്. മാത്രമല്ല, ബാഹ്യലോകവുമായി ബന്ധമില്ലാത്തതിനാൽ ഇത് സുരക്ഷാ ദൃഷ്ട്യാ അനുയോജ്യമായ സ്ഥലവുമായിരുന്നു. അന്നത്തെ ലക്ഷദ്വീപ് പോലീസ് മേധാവി പി.എൻ. അഗർവാളിൻ്റെ വാക്കുകളിൽ പറഞ്ഞാൽ ‘അത് സ്വാഭാവികമായി സുരക്ഷിതമായ ഒരിടമായിരുന്നു.’
ആഢംബരവും അതിഥികളും: വിവാദങ്ങളുടെ തുടക്കം
അവധിക്കാലം ആരംഭിച്ചത് ഡിസംബർ 26-ന്, രാജീവിൻ്റെ മകൻ രാഹുലും നാല് കൂട്ടുകാരും ലക്ഷദ്വീപ് അഡ്മിനിസ്‌ട്രേഷൻ ഹെലികോപ്റ്ററിൽ ബംഗാരത്തിൽ വന്നിറങ്ങിയതോടെയാണ്. പ്രധാനമന്ത്രിയും സോണിയ ഗാന്ധിയും ഡിസംബർ 30-ന് അവധിക്ക് എത്തിച്ചേർന്നു. എന്നാൽ, ക്ഷണിക്കപ്പെട്ട അതിഥികളുടെ പട്ടികയാണ് മാധ്യമശ്രദ്ധ ആകർഷിച്ചത്. ബോളിവുഡ് താരമായ അമിതാഭ് ബച്ചൻ, ഭാര്യ ജയ ബച്ചൻ, അവരുടെ മൂന്ന് മക്കൾ, കൂടാതെ രാജീവ് ഗാന്ധിയുടെ ഇറ്റാലിയൻ ബന്ധുക്കളായ സോണിയയുടെ സഹോദരി, അളിയൻ, മകൾ, വിധവയായ അമ്മ ആർ. മൈനോ, സഹോദരൻ, ഒരമ്മാവൻ എന്നിവരും അതിഥികളായി പങ്കെടുത്തു. ഇതിലെല്ലാം വലിയ വിമർശനമുയർത്തിയത്, വിദേശനാണ്യ ചട്ടലംഘന കേസിൽ അന്വേഷണം നേരിടുന്ന അമിതാഭ് ബച്ചൻ്റെ സഹോദരൻ അജിതാഭ് ബച്ചൻ്റെ മകൾ സംഘത്തിലുണ്ടായിരുന്നു എന്നതായിരുന്നു.
യുദ്ധക്കപ്പലിനെ സ്വകാര്യ ആവശ്യത്തിന് ഉപയോഗിച്ചപ്പോൾ
ഒരു സ്വകാര്യ അവധിക്കുവേണ്ടി രാജ്യത്തിൻ്റെ പ്രതിരോധ സംവിധാനങ്ങൾ ഉപയോഗിച്ചു എന്നതായിരുന്നു രാജീവിൻ്റെ ലക്ഷദ്വീപ് യാത്ര നേരിട്ട ഏറ്റവും വലിയ രാഷ്ട്രീയ വിമർശനം. ഇന്ത്യയുടെ പ്രമുഖ യുദ്ധക്കപ്പലായ ഐ.എൻ.എസ്. വിരാട്, ഗാന്ധി കുടുംബത്തെയും അതിഥികളെയും ലക്ഷദ്വീപിലെത്തിക്കാനായി പത്തുദിവസത്തോളം അറബിക്കടലിൽ വിന്യസിക്കപ്പെട്ടു. ഒരു അന്തർവാഹിനിയും അകമ്പടിയായി ഉണ്ടായിരുന്നതായി റിപ്പോർട്ടുണ്ട്. നാവികസേനയുടെ ഏറ്റവും പ്രധാനപ്പെട്ട കപ്പലുകളിൽ ഒന്നിനെ പ്രധാനമന്ത്രിയുടെ വ്യക്തിപരമായ ആവശ്യങ്ങൾക്കായി ഉപയോഗിക്കുന്നത് ശരിയാണോ എന്ന ചോദ്യം പ്രതിരോധ വിദഗ്ധർ പോലും ഉയർത്തി. കൂടാതെ, അവധിക്കാലം മുഴുവൻ ആശയവിനിമയം ഉറപ്പാക്കാൻ അഗത്തിയിൽ പ്രത്യേക സാറ്റലൈറ്റ് ലിങ്ക് സംവിധാനവും സ്ഥാപിച്ചിരുന്നു.
ഭക്ഷണക്രമീകരണങ്ങളും ആഡംബരത്തിൻ്റെ കാര്യത്തിൽ ഒട്ടും പിന്നിലായിരുന്നില്ല. ദ്വീപ് ഭരണകൂടത്തിൻ്റെ ടൂറിസം വിഭാഗമായ SPORTS ആയിരുന്നു ഭക്ഷണ കാര്യങ്ങൾ നോക്കിയത്. ഡൽഹിയിൽ നിന്നുള്ള ഗാന്ധിമാരുടെ സ്വന്തം പാചകക്കാരൻ മേൽനോട്ടം വഹിച്ചു. ലക്ഷദ്വീപിലെ പ്രാദേശിക പഴങ്ങൾക്കൊപ്പം, തലസ്ഥാനത്ത് നിന്ന് വൈനുകളും മദ്യവും എത്തിച്ചു. 100 കോഴികളെ വളർത്തുന്ന ഒരു താത്കാലിക ഫാം അഗത്തിയിൽ ഒരുക്കിയിരുന്നു. കൊച്ചിയിൽ നിന്ന് 40 ക്രേറ്റ് ശീതളപാനീയങ്ങൾ, 300 കുപ്പികളോളം മിനറൽ വാട്ടർ, കാഡ്ബറി ചോക്ലേറ്റുകൾ, അമുൽ ചീസ്, 105 കിലോ ബസ്മതി അരി, പുതിയ പച്ചക്കറികൾ എന്നിവയും എത്തിച്ചതായി റിപ്പോർട്ടിൽ പറയുന്നു.
അവധിക്കാലം: ഡോൾഫിനെ രക്ഷിച്ച രാജീവ്
ഒരു വശത്ത് വിമർശനങ്ങൾ ഉയരുമ്പോഴും, ദ്വീപിൽ ഒരാഴ്ചയോളം നീണ്ടുനിന്ന അവധിക്കാലം തികച്ചും മനോഹരമായിരുന്നു. അതിഥികൾ നീന്തൽ, സൂര്യസ്നാനം, മീൻപിടിത്തം, കപ്പൽ യാത്ര തുടങ്ങിയ വിനോദങ്ങളിൽ മുഴുകി. അടുത്തുള്ള ജനവാസമില്ലാത്ത തിണ്ണക്കര, പറളി ദ്വീപുകളിലേക്ക് വിനോദയാത്രകളും ബീച്ച് പാർട്ടികളും സംഘടിപ്പിച്ചു. രാജീവ്, രാഹുൽ, പ്രിയങ്ക എന്നിവർ കടലിൽ ധാരാളം സമയം ചെലവഴിച്ചു. രാജീവ് ഗാന്ധിക്ക് ദ്വീപ് ഒരുപാട് ഇഷ്ടമായിരുന്നുവെന്നും, മുമ്പ് 1985-ൽ അദ്ദേഹം ഇവിടെ വന്നിട്ടുണ്ടെന്നും ലക്ഷദ്വീപ് അഡ്മിനിസ്ട്രേറ്ററായിരുന്ന വജാഹത്ത് ഹബീബുള്ള അനുസ്മരിക്കുന്നുണ്ട്. ഒരിക്കൽ കരയ്ക്കടിഞ്ഞ, രക്തം വാർന്ന ഒരു ഡോൾഫിനെ രക്ഷിക്കാൻ രാജീവ് ഗാന്ധി വെള്ളത്തിൽ ഇറങ്ങിയതായും റിപ്പോർട്ടുണ്ട്.
അതേസമയം, ആസ്ത്മയുള്ള സോണിയ ഗാന്ധി അമ്മയോടും ജയ ബച്ചനോടുമൊപ്പം തെങ്ങിൻ്റെ തണലിലിരുന്ന് സംസാരിക്കാനും, ഗ്ലാസ് ബോട്ടിൽ സഞ്ചരിച്ച് കടലിനടിയിലെ കാഴ്ചകൾ കാണാനുമാണ് താൽപര്യപ്പെട്ടത്. ജനുവരി 6-ന് അവധി അവസാനിച്ചു. ലക്ഷദ്വീപ് യാത്ര ‘അത്ഭുതകരമായിരുന്നു’ എന്ന് രാജീവ് ഗാന്ധി തുറന്നു സമ്മതിച്ചു. അവധിയുമായി ബന്ധപ്പെട്ട മുഴുവൻ ബില്ലുകളും താൻ അടയ്ക്കുമെന്ന് പ്രധാനമന്ത്രി നിർദ്ദേശിച്ചതായും, ലക്ഷദ്വീപ് ഭരണകൂടം ബില്ലുകൾ തയ്യാറാക്കി സമർപ്പിക്കാൻ കാത്തിരിക്കുകയാണെന്നും അധികൃതർ അന്ന് അറിയിച്ചു. ഈ വിവാദ യാത്ര ലക്ഷദ്വീപിന് വലിയ പ്രചാരം നൽകിയെന്നും, ടൂറിസത്തിലൂടെ ദ്വീപിന് സാമ്പത്തിക ഉണർവുണ്ടാക്കാൻ ഇത് സഹായിച്ചെന്നും ലക്ഷദ്വീപിലെ അന്നത്തെ എം.പി. പി.എം. സഈദ് അഭിപ്രായപ്പെട്ടതായും ഇന്ത്യ ടുഡേയുടെ 1988-ലെ റിപ്പോർട്ട് പറയുന്നു.
കടപ്പാട്: ഇന്ത്യാ ടുഡേ ഓൺലൈൻ.
