കവരത്തി: ലക്ഷദ്വീപിൽ മദ്യം അനുവദിക്കാനുള്ള ഭരണകൂടത്തിന്റെ പുതിയ തീരുമാനത്തിനെതിരെയും ‘നോ വെഹിക്കിൾ ഡേ’ (No Vehicle Day) പരിഷ്കാരത്തിനെതിരെയും ശക്തമായ പ്രതിഷേധവുമായി എൻ.സി.പി (എസ്.പി) രംഗത്ത്. ദ്വീപ് സമൂഹത്തിന്റെ തനതായ സാംസ്കാരികവും സാമൂഹികവുമായ മൂല്യങ്ങളെ പൂർണ്ണമായും അവഗണിക്കുന്ന മദ്യനയം ജനവിരുദ്ധമാണെന്ന് എൻ.സി.പി (എസ്.പി) ലക്ഷദ്വീപ് സ്റ്റേറ്റ് പ്രസിഡന്റ് അഡ്വ. കോയ അറഫ മിറാജ് കുറ്റപ്പെടുത്തി. ശാന്തമായ ദ്വീപ് ജീവിതത്തെയും സാമൂഹികാന്തരീക്ഷത്തെയും ഈ തീരുമാനം ദോഷകരമായി ബാധിക്കുമെന്നും, ഇതിന് പിന്നിൽ ലക്ഷദ്വീപ് എംപിയുടെ മൗനാനുവാദം ഉണ്ടോ എന്ന് സംശയിക്കേണ്ടിയിരിക്കുന്നുവെന്നും അദ്ദേഹം പ്രസ്താവിച്ചു. ജനവികാരം മാനിച്ച് ഈ ഉത്തരവ് അടിയന്തരമായി പുനഃപരിശോധിക്കണമെന്ന് അദ്ദേഹം സർക്കാരിനോട് ആവശ്യപ്പെട്ടു.
അതോടൊപ്പം, ദ്വീപിൽ നടപ്പിലാക്കാൻ ഉദ്ദേശിക്കുന്ന ‘നോ വെഹിക്കിൾ ഡേ’ എന്ന ആശയത്തോടും പാർട്ടി കടുത്ത വിയോജിപ്പ് രേഖപ്പെടുത്തി. വിഷയവുമായി ബന്ധപ്പെട്ട് ജില്ലാ കളക്ടർ ഗിരി ശങ്കർ IAS-നെ നേരിൽ കണ്ട പാർട്ടി നേതൃത്വം, ഈ പരിഷ്കാരം ജനങ്ങൾക്ക് വലിയ ബുദ്ധിമുട്ടുകൾ സൃഷ്ടിക്കുമെന്നും ഇത് നടപ്പിലാക്കാൻ അനുവദിക്കില്ലെന്നും വ്യക്തമാക്കി. തുടർന്ന് നടന്ന സർവ്വകക്ഷി യോഗത്തിലും (All Party Meeting) എൻ.സി.പി പ്രതിനിധികൾ ഇതേ നിലപാട് ആവർത്തിച്ചു. ജനങ്ങൾ നേരിടാൻ പോകുന്ന പ്രായോഗിക ബുദ്ധിമുട്ടുകൾ അക്കമിട്ടു നിരത്തിയ പാർട്ടി നേതൃത്വം, ഈ നീക്കത്തിൽ നിന്ന് ഭരണകൂടം എത്രയും പെട്ടെന്ന് പിന്തിരിയണമെന്ന് ശക്തമായ ഭാഷയിൽ ആവശ്യപ്പെട്ടു.
