കവരത്തി: കവരത്തിയിൽ ചേർന്ന കോക്ക്റോച്ച് ജനതാ പാർട്ടി (CJP) വോളണ്ടിയർ യോഗത്തിൽ ലക്ഷദ്വീപിലെ ജനങ്ങളെ ബാധിക്കുന്ന വിവിധ വിഷയങ്ങളുമായി ബന്ധപ്പെട്ട് സുപ്രധാന തീരുമാനങ്ങൾ കൈക്കൊണ്ടു. ദ്വീപിൽ നിലനിൽക്കുന്ന ജനദ്രോഹ വിഷയങ്ങളിൽ പൊതുജനങ്ങളെ കൂടുതൽ ബോധവാന്മാരാക്കുന്നതിനായി ബോധവൽക്കരണ പരിപാടികൾ സംഘടിപ്പിക്കാൻ യോഗം തീരുമാനിച്ചു. ദ്വീപിന്റെ നന്മയ്ക്കായി ആത്മാർത്ഥമായി പ്രവർത്തിക്കാൻ താല്പര്യമുള്ളവരെ ഏകോപിപ്പിക്കുന്നതിനായി ഒരു ഗൂഗിൾ ഫോം (Google Form) തയ്യാറാക്കി പൊതുജനങ്ങളിലേക്ക് എത്തിക്കാനും യോഗത്തിൽ തീരുമാനമായിട്ടുണ്ട്.
കൂട്ടായ്മയുടെ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിന്റെ ഭാഗമായി മീഡിയ വിംഗും ലീഗൽ സെല്ലും രൂപീകരിച്ചു. കൂടാതെ, ദ്വീപിലെ മുതിർന്ന വ്യക്തികളുടെ അനുഭവ സമ്പത്തും നിർദ്ദേശങ്ങളും പ്രയോജനപ്പെടുത്തുന്നതിനായി ഒരു അഡ്വൈസറി സെൽ രൂപീകരിക്കാനും തീരുമാനമായി. ദ്വീപ് ജനത നേരിടുന്ന വിവിധ പ്രശ്നങ്ങളിൽ സമയോചിതവും ജനാധിപത്യപരവുമായ ഇടപെടലുകൾ നടത്തുന്നതിനും, ആവശ്യമായ സാഹചര്യങ്ങളിൽ ജനകീയ പ്രതിഷേധങ്ങളും ബോധവൽക്കരണ പരിപാടികളും സംഘടിപ്പിക്കാനും യോഗം തീരുമാനമെടുത്തു.
ഓരോ ദ്വീപിലും ദ്വീപിന്റെ നന്മയ്ക്കായി പ്രവർത്തിക്കാൻ തയ്യാറുള്ള യുവാക്കളെ ഉൾപ്പെടുത്തി യോഗങ്ങൾ സംഘടിപ്പിക്കാനും, പ്രാദേശിക അഡ്മിൻ പാനലുകളും വോളണ്ടിയർ ശൃംഖലയും രൂപീകരിക്കാനും തീരുമാനിച്ചിട്ടുണ്ട്. ഇതിൽ പങ്കാളികളാകാൻ തയ്യാറുള്ളവർ അഡ്മിൻ പാനലുമായി ബന്ധപ്പെടണമെന്ന് സി.ജെ.പി (CJP) ലക്ഷദ്വീപ് ഘടകം അറിയിച്ചു.
