ന്യൂഡൽഹി: ലക്ഷദ്വീപ് അഡ്മിനിസ്ട്രേറ്ററായി പ്രഫുൽ ഖോഡ പട്ടേലിന്റെ തുടർച്ചയായ നിയമനത്തിൽ ആശങ്ക പ്രകടിപ്പിച്ച് എൻസിപി (എസ്പി) നേതാവും എംപിയുമായ സുപ്രിയ സുലെ, കേന്ദ്ര ആഭ്യന്തര മന്ത്രി അമിത് ഷായെ നേരിൽ കണ്ട് നിവേദനം കൈമാറി. അഡ്മിനിസ്ട്രേറ്റർ സ്ഥാനത്തുനിന്ന് പട്ടേലിനെ നീക്കം ചെയ്യണമെന്നും, ലക്ഷദ്വീപിന് ഒരു മുഴുവൻ സമയ അഡ്മിനിസ്ട്രേറ്ററെ നിയമിക്കണമെന്നും അവർ കത്തിൽ ആവശ്യപ്പെട്ടു. കേന്ദ്രഭരണ പ്രദേശങ്ങളിലെ അഡ്മിനിസ്ട്രേറ്റർമാരുടെ നിയമനവുമായി ബന്ധപ്പെട്ട ചില പ്രശ്നങ്ങളും കത്തിൽ സുപ്രിയ സുലെ ചൂണ്ടിക്കാട്ടി.
പ്രഫുൽ പട്ടേലിന്റെ നിയമനം:
2016 മുതൽ, കേന്ദ്രഭരണ പ്രദേശങ്ങളിലെ അഡ്മിനിസ്ട്രേറ്റർമാരായി ഐ.എ.എസ് ഉദ്യോഗസ്ഥരെ നിയമിക്കുന്നതിനുപകരം രാഷ്ട്രീയക്കാരെ നിയമിക്കുന്ന പുതിയ രീതി ആരംഭിച്ചതായി സുപ്രിയ സുലെ കത്തിൽ പറയുന്നു. 2016-ൽ ഫറൂഖ് ഖാൻ (റിട്ട. ഐ.പി.എസ്) ലക്ഷദ്വീപിന്റെ അഡ്മിനിസ്ട്രേറ്ററായി ആദ്യത്തെ രാഷ്ട്രീയ നിയമനം ആയിരുന്നു. അതേസമയം, ഗുജറാത്തിൽ നിന്നുള്ള മുൻ എം.എൽ.എയായ പ്രഫുൽ ഖോഡ പട്ടേലിനെ ദാമൻ ആൻഡ് ദിയു, ദാദ്ര & നഗർ ഹവേലി എന്നിവിടങ്ങളിലെ അഡ്മിനിസ്ട്രേറ്ററായും നിയമിച്ചു. 2019-ൽ ഫറൂഖ് ഖാൻ പുതിയ ചുമതലയുമായി ജമ്മു കാശ്മീരിലേക്ക് മാറിയപ്പോൾ, ദിനേശ്വർ ശർമ്മയെ (റിട്ട. ഐ.പി.എസ്) ലക്ഷദ്വീപിന്റെ അഡ്മിനിസ്ട്രേറ്ററായി നിയമിച്ചു. അതേ വർഷം ഡിസംബറിൽ അദ്ദേഹത്തിന്റെ മരണശേഷം, പട്ടേലിന് ലക്ഷദ്വീപിന്റെ അധിക ചുമതല നൽകി. ഈ ഇരട്ടച്ചുമതല ഇതുവരെ തുടർന്നു വരുന്നു.
പ്രഫുൽ പട്ടേൽ ഏകദേശം ഒമ്പത് വർഷമായി കേന്ദ്ര ഭരണ പ്രദേശങ്ങളിലെ അഡ്മിനിസ്ട്രേറ്റർ എന്ന സ്ഥാനത്ത് തുടരുകയാണ്, 2026 സെപ്റ്റംബറോടെ ഇത് പത്ത് വർഷം പൂർത്തിയാകും, ഇത് ഈ സ്ഥാനത്ത് അഭൂതപൂർവമായ കാലയളവാണ്. സാധാരണയായി അഞ്ച് വർഷം വരെയാണ് ഇത്തരം നിയമനങ്ങളുടെ കാലാവധി. ഈ കാലയളവിൽ അദ്ദേഹത്തിന്റെ നിയമനം പുനരാരംഭിക്കുകയോ പുതുക്കുകയോ ചെയ്തിട്ടില്ല എന്നും സുലെ കത്തിൽ ചൂണ്ടിക്കാട്ടി.
ലക്ഷദ്വീപിൽ മുഴുവൻ സമയ അഡ്മിനിസ്ട്രേറ്ററുടെ അഭാവം:
2021 വരെ, ലക്ഷദ്വീപിന് കവരത്തിയിൽ താമസിക്കുന്ന ഒരു മുഴുവൻ സമയ അഡ്മിനിസ്ട്രേറ്റർ ഉണ്ടായിരുന്നു. എന്നാൽ, പട്ടേൽ ചുമതലയേറ്റ ശേഷം, അദ്ദേഹത്തിന്റെ പ്രധാന ഓഫീസ് ദാമൻ & ദിയുവിൽ തുടരുകയാണ്. അദ്ദേഹം റിമോട്ട് വഴിയാണ് ലക്ഷദ്വീപിന്റെ കാര്യങ്ങൾ കൈകാര്യം ചെയ്യുന്നത്. ഓരോ രണ്ട് മാസത്തിലും ചെറിയ സന്ദർശനത്തിനായി മാത്രമാണ് അദ്ദേഹം ലക്ഷദ്വീപിൽ എത്തുന്നത്. മുൻപ് ഇതിനായി ചാർട്ടേർഡ് ഫ്ലൈറ്റുകൾ ഉപയോഗിച്ചിരുന്നു, ഇത് വലിയ ചെലവുകൾക്ക് കാരണമായി. ഈ സാഹചര്യം തന്ത്രപ്രധാനവും ഒറ്റപ്പെട്ടതുമായ ലക്ഷദ്വീപിനെ അഞ്ച് വർഷത്തോളം ഒരു മുഴുവൻ സമയ റെസിഡന്റ് അഡ്മിനിസ്ട്രേറ്റർ ഇല്ലാതെയാക്കി.
സത്യപ്രതിജ്ഞയുടെ അഭാവം:
ഭരണഘടനാപരമായ പദവികളിൽ നിയമിതരാകുന്നവർ ഭരണഘടനയോടുള്ള കൂറ് സത്യപ്രതിജ്ഞ ചെയ്യേണ്ടത് നിർബന്ധമാണ്. എന്നാൽ, പ്രഫുൽ പട്ടേലിനെ അഡ്മിനിസ്ട്രേറ്ററായി നിയമിച്ചപ്പോൾ ഈ സത്യപ്രതിജ്ഞ നടന്നിട്ടില്ലെന്ന് സുപ്രിയ സുലെ ചൂണ്ടിക്കാട്ടി. ഐ.എ.എസ് ഉദ്യോഗസ്ഥരെ നിയമിക്കുമ്പോൾ ഈ പ്രശ്നം ഉണ്ടാകുന്നില്ല, കാരണം അവർ സേവനത്തിൽ പ്രവേശിക്കുമ്പോൾ തന്നെ സത്യപ്രതിജ്ഞ ചെയ്യുന്നുണ്ട്. എന്നാൽ, രാഷ്ട്രീയ നിയമനങ്ങൾ നടത്തുമ്പോൾ ഇത് നിർബന്ധമായും പാലിക്കേണ്ടതാണ്. ഈ നടപടിക്രമത്തിന്റെ അഭാവം ഉത്തരവാദിത്തത്തെ സങ്കീർണ്ണമാക്കുകയും ഓഫീസിന്റെ നിയമസാധുതയെ ദുർബലപ്പെടുത്തുകയും ചെയ്യുമെന്നും സുലെ കത്തിൽ പറയുന്നു. അഡ്മിനിസ്ട്രേറ്ററെ സഹായിക്കാൻ ഒരു ഉപദേശക സംവിധാനം ഇല്ലാത്തതും, ഭരണപരമായ തീരുമാനങ്ങൾ പൂർണ്ണമായും അഡ്മിനിസ്ട്രേറ്ററുടെ കൈകളിൽ കേന്ദ്രീകരിക്കപ്പെടുന്നതും സുപ്രീയ സുലെ കത്തിൽ ചൂണ്ടിക്കാട്ടി.
പ്രധാന ആവശ്യങ്ങൾ:
സുപ്രിയ സുലെ കേന്ദ്ര സർക്കാരിനോട് താഴെ പറയുന്ന ആവശ്യങ്ങൾ ഉന്നയിച്ചു:
• പ്രഫുൽ പട്ടേലിന്റെ നിയമനം പുനഃപരിശോധിക്കുകയും എത്രയും പെട്ടെന്ന് തന്നെ അദ്ദേഹത്തെ തൽസ്ഥാനത്ത് നിന്നും നീക്കം ചെയ്യുകയും വേണം.
•അഡ്മിനിസ്ട്രേറ്റർമാരുടെ ഭാവി നിയമനങ്ങൾക്ക് ഒരു നിശ്ചിത കാലാവധി ഏർപ്പെടുത്തുക.
• പട്ടേലിന്റെ സത്യപ്രതിജ്ഞയുടെ പിഴവ് ഉടനടി തിരുത്തുക, ഭാവിയിൽ ഇത്തരം നിയമനങ്ങളിൽ സത്യപ്രതിജ്ഞ നിർബന്ധമാക്കുക.
• ലക്ഷദ്വീപിൽ മുഴുവൻ സമയ അഡ്മിനിസ്ട്രേറ്ററെ നിയമിക്കുക
