അമിനി: 20-ാമത് ദേശീയ അന്തർജില്ലാ ജൂനിയർ അത്ലറ്റിക്സ് മീറ്റിൽ (NIDJAM 2026) പങ്കാളികളാകുന്ന അമിനി അത്ലറ്റിക്സ് അസോസിയേഷൻ ടീമിനായുള്ള സെലക്ഷൻ ട്രയൽസ് സെപ്റ്റംബർ 25, 26 തീയതികളിൽ അമിനി അടൽ ബിഹാരി വാജ്പേയി സ്റ്റേഡിയത്തിൽ വെച്ച് നടക്കും. രാവിലെയെയും വൈകുന്നേരത്തെയുമായി നടക്കുന്ന വിവിധ സെഷനുകളിലാണ് സെലക്ഷൻ മത്സരങ്ങൾ സംഘടിപ്പിച്ചിരിക്കുന്നത്.
തെലങ്കാന സർക്കാരിന്റെ സഹകരണത്തോടെ നടക്കുന്ന 20-ാമത് ദേശീയ അന്തർജില്ലാ ജൂനിയർ അത്ലറ്റിക്സ് മീറ്റ് 2026 നവംബർ 14 മുതൽ 16 വരെ തെലങ്കാനയിലെ ഹൈദരാബാദിലുള്ള വോക്സൻ യൂണിവേഴ്സിറ്റി (Woxsen University, Kamkole, Sadasivpet) ക്യാമ്പസിൽ വെച്ചാണ് അരങ്ങേറുന്നത്. രാജ്യത്തിന്റെ വിവിധ ഭാഗങ്ങളിൽ നിന്നുള്ള ജില്ലാ തല അത്ലറ്റിക്സ് അസോസിയേഷനുകളെ പ്രതിനിധീകരിച്ച് അനേകം ജൂനിയർ കായികതാരങ്ങൾ ഈ ദേശീയ കായികമാമാങ്കത്തിൽ മാറ്റുരയ്ക്കും.
മത്സരത്തിൽ 14 വയസ്സിന് താഴെയുള്ളവർക്കും (Under 14) 16 വയസ്സിന് താഴെയുള്ളവർക്കും (Under 16) ബോയ്സ്, ഗേൾസ് വിഭാഗങ്ങളിലായി പങ്കെടുക്കാം. 2012 നവംബർ 17-നും 2014 നവംബർ 16-നും ഇടയിൽ ജനിച്ചവർക്ക് U-14 വിഭാഗത്തിലും, 2010 നവംബർ 17-നും 2012 നവംബർ 16-നും ഇടയിൽ ജനിച്ചവർക്ക് U-16 വിഭാഗത്തിലും മത്സരിക്കാം. എന്നാൽ 2026 നവംബർ 16 അടിസ്ഥാനമാക്കി 12 വയസ്സിൽ താഴെയുള്ള കുട്ടികൾക്ക് മത്സരത്തിൽ പങ്കെടുക്കാൻ യോഗ്യതയുണ്ടായിരിക്കുന്നതല്ല.
ട്രയാത്ത്ലൺ, കിഡ്സ് ജാവലിൻ ത്രോ, 60 മീറ്റർ, 600 മീറ്റർ ഓട്ടം, ഹർഡിൽസ്, ലോങ് ജംപ്, ഹൈ ജംപ്, ഷോട്പുട്, ജാവലിൻ ത്രോ, പെന്റാത്ത്ലൺ ഉൾപ്പെടെയുള്ള വിവിധ ഇനങ്ങളിലാണ് ട്രയൽസ് നടക്കുന്നത്. U-14 വിഭാഗത്തിൽ ഒരു താരത്തിന് ഏതെങ്കിലും ഒരു ട്രയാത്ത്ലൺ ഗ്രൂപ്പിലും കിഡ്സ് ജാവലിൻ ത്രോയിലും പങ്കെടുക്കാം. U-16 വിഭാഗത്തിൽ ഒരു ഇനത്തിലാണ് പങ്കാളിത്തം അനുവദിക്കുക.
ദേശീയതലത്തിൽ കായിക മികവ് തെളിയിക്കാൻ ആഗ്രഹിക്കുന്ന യോഗ്യരായ മുഴുവൻ അത്ലറ്റുകളും സെലക്ഷൻ ട്രയൽസിൽ നിർബന്ധമായും പങ്കെടുക്കണമെന്ന് അമിനി അത്ലറ്റിക്സ് അസോസിയേഷൻ ഭാരവാഹികൾ അഭ്യർത്ഥിച്ചു. ട്രയൽസിനെക്കുറിച്ചുള്ള കൂടുതൽ വിവരങ്ങൾക്ക് +91 94002 23036, +91 94003 40510 എന്നീ ഫോൺ നമ്പറുകളിൽ ബന്ധപ്പെടാവുന്നതാണ്.
