ന്യൂഡൽഹി: ലക്ഷദ്വീപിലെ പണ്ടാരം, പ്രൈവറ്റ് ഭൂമികളുമായി ബന്ധപ്പെട്ട ഡൈവേർഷൻ സർട്ടിഫിക്കറ്റുകൾ റദ്ദാക്കിയ ഭരണകൂട നടപടിക്കെതിരെ പാർലമെന്റിൽ ശക്തമായ പ്രതിഷേധം രേഖപ്പെടുത്തി ലക്ഷദ്വീപ് എം.പി അഡ്വ. ഹംദുള്ള സഈദ്. 2026 മാർച്ച് 14-ന് പുറപ്പെടുവിച്ച വിവാദ ഉത്തരവ് ദ്വീപ് നിവാസികളെ കടുത്ത പ്രതിസന്ധിയിലാക്കിയിരിക്കുകയാണെന്ന് അദ്ദേഹം ലോക്സഭയിൽ ചൂണ്ടിക്കാട്ടി. കൃത്യമായ പരിശോധനകൾക്ക് ശേഷം ബന്ധപ്പെട്ട അധികാരികൾ നൽകിയ സർട്ടിഫിക്കറ്റുകളുടെ അടിസ്ഥാനത്തിലാണ് പല കുടുംബങ്ങളും തങ്ങളുടെ ജീവിതസമ്പാദ്യം ഉപയോഗിച്ച് വീടുകളും മറ്റും നിർമ്മിച്ചത്. എന്നാൽ യാതൊരു മുന്നറിയിപ്പുമില്ലാതെ ഈ അനുമതികൾ റദ്ദാക്കിയത് ജനങ്ങളിൽ വലിയ തോതിലുള്ള അനിശ്ചിതത്വത്തിനും ആശങ്കയ്ക്കും കാരണമായിരിക്കുകയാണ്.
നിലവിൽ നടന്നുകൊണ്ടിരിക്കുന്ന നിർമ്മാണ പ്രവർത്തനങ്ങൾ പോലും സ്റ്റോപ്പ് മെമ്മോ നൽകി തടഞ്ഞിരിക്കുകയാണെന്ന് എം.പി സഭയെ അറിയിച്ചു. വീട് പണിക്കായി വായ്പയെടുത്തവരും മറ്റ് മാർഗങ്ങളിലൂടെ പണം കണ്ടെത്തിയവരും ഭരണകൂടത്തിന്റെ ഈ പെട്ടെന്നുള്ള തീരുമാനം മൂലം കടുത്ത സാമ്പത്തിക-സാമൂഹിക പ്രത്യാഘാതങ്ങൾ നേരിടുകയാണ്. ലക്ഷദ്വീപ് പോലെയുള്ള ഒരു പ്രദേശത്ത് ഭൂമി ലഭ്യത വളരെ കുറവാണെന്ന യാഥാർത്ഥ്യം നിലനിൽക്കെയാണ് ഇത്തരം ജനവിരുദ്ധ നടപടികളുമായി അഡ്മിനിസ്ട്രേഷൻ മുന്നോട്ട് പോകുന്നത്. സാധാരണക്കാരുടെ താൽപ്പര്യങ്ങൾ സംരക്ഷിക്കപ്പെടണമെന്നും അവരുടെ വീടെന്ന സ്വപ്നം തകർക്കുന്ന നീക്കങ്ങളിൽ നിന്ന് ഭരണകൂടം പിന്മാറണമെന്നും അദ്ദേഹം ആവശ്യപ്പെട്ടു.
വിഷയത്തിൽ കേന്ദ്ര ആഭ്യന്തര മന്ത്രാലയം അടിയന്തരമായി ഇടപെടണമെന്നാണ് ഹംദുള്ള സഈദിന്റെ പ്രധാന ആവശ്യം. ലക്ഷദ്വീപ് ഒരു കേന്ദ്രഭരണ പ്രദേശം എന്ന നിലയിൽ കേന്ദ്ര സർക്കാരിന് ഇക്കാര്യത്തിൽ നേരിട്ടുള്ള ഉത്തരവാദിത്തമുണ്ടെന്ന് അദ്ദേഹം ഓർമ്മിപ്പിച്ചു. വിവാദമായ ഉത്തരവ് പിൻവലിക്കണമെന്നും നിയമപരമായ എല്ലാ നടപടികളും പാലിച്ച് നിർമ്മാണം തുടങ്ങിയ കുടുംബങ്ങളെ ഇതിൽ നിന്ന് ഒഴിവാക്കണമെന്നും അദ്ദേഹം ആവശ്യപ്പെട്ടു. ജനസൗഹൃദപരമായ ഒരു സംവിധാനം വികസിപ്പിച്ചെടുക്കുന്നതിലൂടെ മാത്രമേ ദ്വീപ് നിവാസികളുടെ ആശങ്കകൾ പരിഹരിക്കാൻ സാധിക്കൂ എന്ന് വ്യക്തമാക്കിയ അദ്ദേഹം, ബാധിക്കപ്പെട്ട കുടുംബങ്ങൾക്ക് അടിയന്തര ആശ്വാസം നൽകണമെന്നും അഭ്യർത്ഥിച്ചു.
