കവരത്തി: ലക്ഷദ്വീപിലെ കടൽ പായൽ കൃഷി വ്യാപിപ്പിക്കുന്നതിനായി കേന്ദ്ര സമുദ്ര മത്സ്യ ഗവേഷണ സ്ഥാപനം (ICAR-CMFRI) കവരത്തി ഫീൽഡ് ലബോറട്ടറിയിൽ യംഗ് പ്രൊഫഷണൽ-I തസ്തികയിലേക്ക് അപേക്ഷ ക്ഷണിച്ചു. നബാർഡ് ധനസഹായം നൽകുന്ന “കടൽ പായൽ കൃഷി സാങ്കേതിക കൈമാറ്റത്തിലൂടെയും പ്രദർശനത്തിലൂടെയും ലക്ഷദ്വീപിൽ മെച്ചപ്പെടുത്തുക” എന്ന പ്രോജക്റ്റിലേക്കാണ് ഈ നിയമനം നടക്കുന്നത്. രണ്ട് വർഷത്തേക്കോ അല്ലെങ്കിൽ പ്രോജക്റ്റ് അവസാനിക്കുന്നത് വരെയോ ആയിരിക്കും ഈ താൽക്കാലിക നിയമനത്തിന്റെ കാലാവധി.
ഈ തസ്തികയിലേക്ക് അപേക്ഷിക്കാൻ താല്പര്യമുള്ള ഉദ്യോഗാർത്ഥികൾ ബി.എഫ്.എസ്സി (B.F.Sc) അല്ലെങ്കിൽ അക്വാകൾച്ചറിലോ അനുബന്ധ ബയോളജിക്കൽ സയൻസിലോ ബിരുദധാരികളായിരിക്കണം. അക്വാകൾച്ചറിൽ ബിരുദാനന്തര ബിരുദമുള്ളവർക്കും കടൽ പായൽ കൃഷിയിൽ മുൻപരിചയമുള്ളവർക്കും മുൻഗണന ലഭിക്കുന്നതാണ്. കൂടാതെ നീന്തൽ വശമുള്ളവർക്ക് പ്രത്യേക പരിഗണന നൽകുമെന്നും വിജ്ഞാപനത്തിൽ വ്യക്തമാക്കുന്നു. അപേക്ഷകർ 21 നും 45 നും ഇടയിൽ പ്രായമുള്ളവരായിരിക്കണം. തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് പ്രതിമാസം 30,000 രൂപ നിശ്ചിത വേതനമായി ലഭിക്കും.
യോഗ്യരായ ഉദ്യോഗാർത്ഥികൾ തങ്ങളുടെ ബയോഡാറ്റയും അസ്സൽ സർട്ടിഫിക്കറ്റുകളുടെ സ്കാൻ ചെയ്ത പകർപ്പുകളും സഹിതം 2026 ഏപ്രിൽ 17-ന് മുൻപായി ഗൂഗിൾ ഫോം (https://forms.gle/R7yJtGaUDfYmCUF69) വഴി അപേക്ഷ സമർപ്പിക്കേണ്ടതാണ്. അപേക്ഷകരിൽ നിന്നും ഷോർട്ട്ലിസ്റ്റ് ചെയ്യപ്പെടുന്നവർക്ക് മാത്രമേ ഇമെയിൽ വഴി അറിയിപ്പ് ലഭിക്കുകയുള്ളൂ. ഇത്തരത്തിൽ സന്ദേശം ലഭിക്കുന്നവർക്ക് മാത്രമേ കവരത്തിയിലുള്ള സി.എം.എഫ്.ആർ.ഐ ഫീൽഡ് ലബോറട്ടറിയിൽ നടക്കുന്ന അഭിമുഖത്തിൽ പങ്കെടുക്കാൻ സാധിക്കുകയുള്ളൂ. അഭിമുഖത്തിന് ഹാജരാകുമ്പോൾ തിരിച്ചറിയൽ രേഖയും സി.ജി.പി.എ (CGPA) മാർക്ക് ഉള്ളവർ അത് ശതമാനത്തിലേക്ക് മാറ്റാനുള്ള അംഗീകൃത ഫോർമുലയും കൈവശം വെക്കേണ്ടതാണ്. മറ്റ് സ്ഥാപനങ്ങളിൽ ജോലി ചെയ്യുന്നവർ എൻ.ഒ.സി (NOC) ഹാജരാക്കണമെന്നും വിജ്ഞാപനത്തിൽ അറിയിച്ചിട്ടുണ്ട്.
