കവരത്തി: ലക്ഷദ്വീപ് ഭരണകൂടത്തിന് കീഴിലുള്ള പൊതുമരാമത്ത് വകുപ്പിലെ (LPWD) ജൂനിയർ എഞ്ചിനീയർ പി.പി. മുഹമ്മദ് കാസിം ഉബൈദുള്ളയെ ഔദ്യോഗിക പദവിയിൽ നിന്ന് പിരിച്ചുവിട്ടുകൊണ്ട് ഉത്തരവിറങ്ങി. ചെത്ലത്ത് എൽ.ബി.ഡി.ബി (LBDB) സ്റ്റോർ യാർഡിന്റെ ചുമതലയിലിരിക്കെ കെട്ടിട നിർമ്മാണ സാമഗ്രികൾ കൈകാര്യം ചെയ്യുന്നതിൽ വരുത്തിയ വീഴ്ചയെത്തുടർന്നാണ് അഡ്മിനിസ്ട്രേറ്ററുടെ അംഗീകാരത്തോടെ അച്ചടക്ക നടപടി സ്വീകരിച്ചത്. 2006 ഓഗസ്റ്റ് മുതൽ 2008 മെയ് വരെയുള്ള കാലയളവിൽ സർക്കാർ ഖജനാവിന് വലിയ സാമ്പത്തിക നഷ്ടമുണ്ടാക്കിയെന്ന കണ്ടെത്തലിന്റെ അടിസ്ഥാനത്തിലാണ് ഈ കടുത്ത നടപടി.
ചെത്ലത്തിലെ സ്റ്റോർ യാർഡിലുണ്ടായിരുന്ന ഗ്രാനൈറ്റ് ചിപ്സ്, റിവർ സാന്റ് (ആറ്റുമണൽ) എന്നീ നിർമ്മാണ സാമഗ്രികൾ കൈകാര്യം ചെയ്തതിൽ കൃത്രിമം കാണിച്ചതായും ഇതുവഴി ഏകദേശം 2,68,227 രൂപയുടെ നഷ്ടം സർക്കാരിന് സംഭവിച്ചതായും അന്വേഷണത്തിൽ വ്യക്തമായിട്ടുണ്ട്. സി.സി.എസ് (കോൺടാക്ട്) ചട്ടങ്ങൾ ലംഘിച്ചുകൊണ്ട് ഔദ്യോഗിക കൃത്യനിർവ്വഹണത്തിൽ സത്യസന്ധത പുലർത്തുന്നതിൽ ഉദ്യോഗസ്ഥൻ പരാജയപ്പെട്ടതായി അധികൃതർ നിരീക്ഷിച്ചു. 2014-ൽ ആരംഭിച്ച വകുപ്പുതല അന്വേഷണത്തിന്റെ അന്തിമ നടപടിയായാണ് നിലവിൽ പിരിച്ചുവിടൽ ഉത്തരവ് പുറപ്പെടുവിച്ചിരിക്കുന്നത്.
നേരത്തെ നടന്ന അന്വേഷണ റിപ്പോർട്ടിൽ ഉദ്യോഗസ്ഥനെതിരെയുള്ള കുറ്റങ്ങൾ തെളിയിക്കപ്പെട്ടിട്ടില്ലെന്ന് രേഖപ്പെടുത്തിയിരുന്നെങ്കിലും, അച്ചടക്ക സമിതി ഈ കണ്ടെത്തൽ തള്ളുകയായിരുന്നു. നിർമ്മാണ സാമഗ്രികളുടെ കുറവ് സംബന്ധിച്ച് ഉദ്യോഗസ്ഥൻ നൽകിയ വിശദീകരണങ്ങളിൽ പൊരുത്തക്കേടുകൾ ഉണ്ടെന്ന് സമിതി കണ്ടെത്തി. എൽ.പി.ഡി.ബി സ്റ്റോക്കിലെ കുറവ് നികത്താൻ എൽ.പി.ഡബ്ല്യു.ഡി സ്റ്റോക്കിലെ സാമഗ്രികൾ ഉപയോഗിച്ചുവെന്ന വാദം അടിസ്ഥാനരഹിതമാണെന്നും രേഖകൾ പരിശോധിച്ച അച്ചടക്ക സമിതി വ്യക്തമാക്കി.
തുടർന്ന് ഉദ്യോഗസ്ഥന് നൽകിയ കാരണം കാണിക്കൽ നോട്ടീസിന് അദ്ദേഹം സമർപ്പിച്ച മറുപടി തൃപ്തികരമല്ലെന്ന് ബോധ്യപ്പെട്ട സാഹചര്യത്തിലാണ് സെക്രെട്ടറി (വർക്സ്) രാഹുൽ സിംഗ് ഐ.എ.എസ് പിരിച്ചുവിടൽ ഉത്തരവ് ഒപ്പിട്ടത്. ഭാവിയിൽ സർക്കാർ ജോലികൾ സ്വീകരിക്കുന്നതിൽ നിന്ന് ഉദ്യോഗസ്ഥനെ വിലക്കിക്കൊണ്ടുള്ള (Disqualification) നടപടികളുൾപ്പെട്ട ‘മേജർ പെനാൽറ്റി’ ആണ് നടപ്പിലാക്കിയിരിക്കുന്നത്. ലക്ഷദ്വീപ് ഭരണകൂടത്തിന്റെ വിസമ്മത കുറിപ്പ് ഉൾപ്പെടെയുള്ള നടപടിക്രമങ്ങൾ പൂർത്തിയാക്കിയ ശേഷമാണ് ഈ അന്തിമ തീരുമാനം കൈക്കൊണ്ടത്.
