ലക്ഷദ്വീപ് യാത്രക്കാരുടെ കാലങ്ങളായുള്ള ദുരിതത്തിന് പരിഹാരമായാണ് കപ്പൽ ടിക്കറ്റുകൾക്കായി പുതിയ ഓൺലൈൻ സംവിധാനം നിലവിൽ വന്നത്. പഴയ ടിക്കറ്റിംഗ് രീതിയുമായി താരതമ്യം ചെയ്യുമ്പോൾ വലിയൊരു മാറ്റം കൊണ്ടുവരാൻ പുതിയ സംവിധാനത്തിന് സാധിച്ചു എന്നത് പ്രശംസനീയമാണ്. എന്നാൽ, ഈ സംവിധാനത്തിലെ സാങ്കേതികമായ ചില പഴുതുകൾ (Loop holes) മുതലെടുത്ത് യാത്രക്കാരെ ചൂഷണം ചെയ്യുന്ന ഒരു വലിയ സംഘം തന്നെ ഇന്ന് സജീവമാണ്.
വ്യാജ അക്കൗണ്ടുകൾ; നിയമവിരുദ്ധ ടിക്കറ്റ് കച്ചവടം
പുതിയ സംവിധാനത്തിലെ ഏറ്റവും വലിയ പോരായ്മ പെർമിറ്റ് ഹോൾഡർമാർക്കായുള്ള അക്കൗണ്ട് നിർമ്മാണത്തിലാണ്. ഏതെങ്കിലും ഒരു വ്യാജ ആധാർ നമ്പർ ഉപയോഗിച്ച് ഒരാൾക്ക് പെർമിറ്റ് ഹോൾഡർ എന്ന നിലയിൽ അക്കൗണ്ട് സൃഷ്ടിക്കാൻ നിലവിൽ സാധിക്കുന്നുണ്ട്. ഇങ്ങനെ നിർമ്മിക്കപ്പെടുന്ന ഒരു അക്കൗണ്ട് വഴി ആരുടെ പെർമിറ്റും ഉപയോഗിച്ച് ടിക്കറ്റ് ബുക്ക് ചെയ്യാമെന്നതാണ് യാഥാർത്ഥ്യം.
ഉദാഹരണത്തിന്, ‘സലീം’ എന്ന പേരിൽ ഒരു പെർമിറ്റ് ഹോൾഡർ അക്കൗണ്ട് ഉണ്ടെന്നിരിക്കട്ടെ. ഈ അക്കൗണ്ട് വഴി ‘അൻവറിന്റേയോ’ ‘കാസിമിന്റേയോ’ പേരിൽ ടിക്കറ്റ് ബുക്ക് ചെയ്യാൻ സാധിക്കും. ഇതിനായി ആ വ്യക്തിയുടെ പെർമിറ്റ് ആപ്ലിക്കേഷൻ നമ്പർ മാത്രം കൈവശമുണ്ടായാൽ മതി. ഈ പഴുതുപയോഗിച്ച് ടിക്കറ്റ് എടുത്തു നൽകുന്ന മാഫിയകൾ ഓരോ ടിക്കറ്റിനും 1000 രൂപ വരെയാണ് അധികമായി യാത്രക്കാരിൽ നിന്നും ഈടാക്കുന്നത്. അർഹതപ്പെട്ടവർക്ക് ടിക്കറ്റ് ലഭിക്കാതെ വരുമ്പോൾ നിവൃത്തിയില്ലാതെ ഇത്തരം ചൂഷണങ്ങൾക്ക് യാത്രക്കാർ വഴങ്ങേണ്ടി വരുന്നു.
ഒരേ സമയം പല ലോഗിനുകൾ; ടിക്കറ്റ് ലഭ്യത കുറയുന്നു
ഐ.ആർ.സി.ടി.സി (IRCTC) പോർട്ടലിലെ മറ്റൊരു പ്രധാന പ്രശ്നം ഒരേ അക്കൗണ്ട് തന്നെ ഒരേ സമയം പലയിടങ്ങളിൽ ലോഗിൻ ചെയ്യാൻ സാധിക്കുന്നു (Simultaneous Login) എന്നതാണ്. ഇത് ടിക്കറ്റ് ലഭ്യതയെ സാരമായി ബാധിക്കുന്നുണ്ട്.
ചിലർ തങ്ങളുടെ അക്കൗണ്ട് വിവരങ്ങൾ മൂന്നു പേർക്ക് പങ്കുവെക്കുകയും, അവർ ഒരേ സമയം ലോഗിൻ ചെയ്ത് ബങ്ക്, സെക്കൻഡ് ക്ലാസ്സ്, ഫസ്റ്റ് ക്ലാസ്സ് എന്നിങ്ങനെ ടിക്കറ്റുകൾ സെലക്ട് ചെയ്യുകയും ചെയ്യുന്നു. പിന്നീട് തങ്ങൾക്ക് ആവശ്യമുള്ളത് മാത്രം നിലനിർത്തി ബാക്കിയുള്ളവ ക്യാൻസൽ ചെയ്യുന്ന രീതിയാണ് ഇവർ പിന്തുടരുന്നത്. ഇത് സാധാരണക്കാരായ യാത്രക്കാർക്ക് ടിക്കറ്റ് ലഭിക്കാനുള്ള സാധ്യതയെ ഇല്ലാതാക്കുന്നു.
അടിയന്തരമായി നടപ്പിലാക്കേണ്ട മാറ്റങ്ങൾ
ടിക്കറ്റിംഗ് സംവിധാനം കുറ്റമറ്റതാക്കാൻ താഴെ പറയുന്ന മാറ്റങ്ങൾ അനിവാര്യമാണ്:
- ലോഗിൻ നിയന്ത്രണം: ഒരു സമയത്ത് ഒരു യൂസറിന് ഒരൊറ്റ ലോഗിൻ മാത്രമേ സാധ്യമാകൂ എന്ന് ഉറപ്പുവരുത്തണം.
- ടിക്കറ്റ് പരിധി: ഒരു രജിസ്റ്റർ ചെയ്ത യൂസറിന് ഒരു കപ്പലിൽ തന്നെ ഒന്നിലധികം ക്ലാസ്സുകളിൽ ടിക്കറ്റ് വരുന്നത് തടയണം.
- സീറ്റ് അവയ്ലബിലിറ്റി ഡിസ്പ്ലേ: ജനറൽ ടിക്കറ്റ് എടുക്കുന്നവർക്ക് സീറ്റ് ലഭ്യത കാണിക്കുന്നിടത്ത് ‘General’, ‘Others’ എന്നിങ്ങനെ പ്രത്യേകം വേർതിരിച്ചു കാണിക്കണം. നാല് ടിക്കറ്റുകൾ ബാക്കിയുണ്ടെന്ന് കണ്ട് യാത്രക്കാർ സീറ്റിനായി തിരയുന്ന ആശയക്കുഴപ്പം ഒഴിവാക്കാൻ ഇത് സഹായിക്കും.
ലക്ഷദ്വീപ് കപ്പൽ യാത്രക്കാരുടെ അവകാശങ്ങൾ സംരക്ഷിക്കപ്പെടേണ്ടതുണ്ട്. ഐ.ആർ.സി.ടി.സി സൈറ്റിലെ ഇത്തരം അപാകതകൾ പരിഹരിക്കപ്പെടുന്നത് വരെയും, സാധാരണക്കാരുടെ ബുദ്ധിമുട്ടുകൾ അധികാരികളുടെ ശ്രദ്ധയിൽപ്പെടുത്തുന്നതിനുമായി ഈ പരമ്പര തുടരും.
