കവരത്തി: ദേശീയതലത്തിൽ ബാങ്ക് ജീവനക്കാരുടെ സംഘടനകൾ ആഹ്വാനം ചെയ്ത പണിമുടക്കിന്റെ ഭാഗമായി കവരത്തി ദ്വീപിലും ബാങ്ക് സേവനങ്ങൾ പൂർണ്ണമായി തടസ്സപ്പെട്ടു. എസ്.ബി.ഐ (SBI), കാനറ ബാങ്ക്, യു.കോ (UCO) എന്നീ പൊതുമേഖലാ ബാങ്കുകളിലെ ജീവനക്കാരും ഓഫീസർമാരും സമരം ഏറ്റെടുത്തതോടെ ബാങ്കുകളുടെ ദൈനംദിന പ്രവർത്തനങ്ങളും ഉപഭോക്തൃ സേവനങ്ങളും നിലച്ചു. അഞ്ചുദിവസ ബാങ്കിംഗ് (Five-Day Banking) പൂർണ്ണമായി നടപ്പാക്കുക, ജീവനക്കാരുടെ സംഭാവനയും ബാങ്കുകളുടെ പ്രകടനവും പരിഗണിച്ച് ന്യായമായ പെർഫോമൻസ് ലിങ്ക്ഡ് ഇൻസെന്റീവ് (Fair PLI) ഉറപ്പാക്കുക, ജീവനക്കാരുടെ ക്ഷേമവും തൊഴിൽ–ജീവിത സന്തുലിതാവസ്ഥയും സംരക്ഷിക്കുക തുടങ്ങിയ പ്രധാന ആവശ്യങ്ങൾ ഉന്നയിച്ചാണ് പ്രതിഷേധം.
അഞ്ചുദിവസ ബാങ്കിംഗ് നടപ്പാക്കുന്നത് ജീവനക്കാരുടെ മാനസിക സമ്മർദ്ദം കുറയ്ക്കുന്നതിനൊപ്പം ബാങ്കിംഗ് മേഖലയിലെ പ്രവർത്തനക്ഷമതയും ഉൽപ്പാദനക്ഷമതയും വർധിപ്പിക്കാൻ സഹായിക്കുമെന്ന് ജീവനക്കാരെ പ്രതിനിധീകരിച്ച് സംസാരിച്ച കാനറ ബാങ്ക് ലീഡ് ഡിസ്ട്രിക്ട് മാനേജർ (LDM) അസറുദ്ദീൻ, എസ്.ബി.ഐ സീനിയർ മാനേജർ റമീസ് ഷെയ്ഖ് എന്നിവർ വ്യക്തമാക്കി. സമരം അവസാനിച്ച ശേഷം ബാങ്കുകളുടെ സാധാരണ പ്രവർത്തനം പുനരാരംഭിക്കുമെന്ന് അധികൃതർ അറിയിച്ചു. പണിമുടക്ക് കാലയളവിൽ അടിയന്തര ആവശ്യങ്ങൾക്കായി ഉപഭോക്താക്കൾ എ.ടി.എം, യു.പി.ഐ (UPI), മൊബൈൽ-ഇന്റർനെറ്റ് ബാങ്കിംഗ് തുടങ്ങിയ ഡിജിറ്റൽ സേവനങ്ങൾ പരമാവധി പ്രയോജനപ്പെടുത്തണമെന്നും ബാങ്ക് അധികൃതർ അഭ്യർത്ഥിച്ചു.
