അഡ്വ. ടി. ഐ. സബീഹ് അമാൻ
ലക്ഷദ്വീപിന്റെ തനിമയും ജൈവവൈവിധ്യവും നിലനിർത്തുന്നതിൽ അവിടുത്തെ തെങ്ങുകളും മരങ്ങളും വലിയ പങ്ക് വഹിക്കുന്നു. ലക്ഷദ്വീപുനിവാസികളുടെ ജീവനോപാധി കൂടിയായ ഈ പച്ചപ്പ്‌, വികസനത്തിന്റെ പേരിൽ വിവിധ മുടന്തൻ ന്യായങ്ങൾ നിരത്തി അഡ്മിനിസ്ട്രേഷൻ വെട്ടിനശിപ്പിക്കുമ്പോൾ, അതിന് കാവലാകേണ്ട പരിസ്ഥിതി വകുപ്പ് (Environment Department) തികഞ്ഞ മൗനത്തിലാണ്. ദ്വീപിന്റെ പരിസ്ഥിതി തകരുമ്പോൾ ഒരക്ഷരം മിണ്ടാതെ മൗനസമ്മതം നൽകുന്ന ഈ വകുപ്പ്, തങ്ങളുടെ യഥാർത്ഥ ഉത്തരവാദിത്തങ്ങളിൽ നിന്ന് ഒളിച്ചോടുകയാണെന്ന ആക്ഷേപം ദ്വീപുകളിൽ ശക്തമാവുകയാണ്.
തകരുന്നത് ദ്വീപുവാസികളുടെ ഉപജീവനമാർഗ്ഗം
ലക്ഷദ്വീപിലെ സാധാരണക്കാരായ ജനങ്ങളുടെ പ്രധാന ഉപജീവനമാർഗ്ഗങ്ങളിലൊന്ന് തെങ്ങുകളെ ആശ്രയിച്ചുള്ളതാണ്. തേങ്ങ, നാളികേര ഉൽപ്പന്നങ്ങൾ, കയർ നിർമ്മാണം എന്നിവയിലൂടെ ജീവിതം മുന്നോട്ട് കൊണ്ടുപോകുന്ന ഒട്ടനവധി കുടുംബങ്ങളാണ് ഇവിടെയുള്ളത്. യാതൊരുവിധ ബദൽ സംവിധാനങ്ങളും ഒരുക്കാതെ, ഈ തെങ്ങുകൾ വെട്ടിനശിപ്പിക്കുന്നത് വഴി തങ്ങളുടെ ഉപജീവന മാർഗ്ഗം പൂർണ്ണമായും ഇല്ലാതാവുകയാണെന്ന് ദ്വീപുവാസികൾ പറയുന്നു. ഈ തെങ്ങുകൾ കൊണ്ട് ജീവിച്ചിരുന്നവർ ഇപ്പോൾ വല്ലാത്ത ബുദ്ധിമുട്ടാണ് അനുഭവിച്ചുകൊണ്ടിരിക്കുന്നത്. കോടിക്കണക്കിന് രൂപയുടെ വരുമാന നഷ്ടത്തോടൊപ്പം പരമ്പരാഗത തൊഴിൽ മേഖലകളും ഇതോടെ തകർച്ച നേരിടുകയാണ്.
മരങ്ങൾ മുറിക്കുമ്പോൾ ഫോട്ടോഗ്രാഫി മത്സരം!
പ്രകൃതി നേരിടുന്ന യഥാർത്ഥ പ്രതിസന്ധികളിൽ നിന്ന് ജനശ്രദ്ധ തിരിച്ചുവിടാൻ ഫോട്ടോഗ്രാഫി മത്സരങ്ങൾ സംഘടിപ്പിക്കുന്നതിലാണ് ഇപ്പോൾ പരിസ്ഥിതി വകുപ്പിന് വലിയ ആവേശം. മരങ്ങൾ ഓരോന്നായി വേരറുക്കപ്പെടുമ്പോൾ അത് തടയാൻ ഒരു വിരൽ പോലും അനക്കാത്തവർ, ദ്വീപിന്റെ പ്രകൃതിഭംഗി ക്യാമറയിൽ പകർത്താൻ മത്സരങ്ങൾ നടത്തുന്നത് തികഞ്ഞ പരിഹാസമാണ്. യഥാർത്ഥ മരങ്ങൾ നശിപ്പിക്കപ്പെടുമ്പോൾ, അതിന്റെ ചിത്രങ്ങൾ മത്സരത്തിന് വെക്കുന്നതിലെ വൈരുദ്ധ്യം എന്താണ്?
‘മരം ഒരു വരം’: കണ്ണിൽ പൊടിയിടാൻ ഫോട്ടോ സെഷനുകൾ
ഇതിലും വലിയ പ്രഹസനമാണ് ലോക പരിസ്ഥിതി ദിനത്തോടനുബന്ധിച്ച് ദ്വീപിൽ അരങ്ങേറുന്നത്. “മരം ഒരു വരം” എന്നൊക്കെയുള്ള ആകർഷകമായ സ്ലോഗനുകൾ പബ്ലിഷ് ചെയ്ത്, വെറുമൊരു ചടങ്ങു തീർക്കാനായി ചിലയിടങ്ങളിൽ ചെടികൾ നട്ടുപിടിപ്പിക്കുന്നു. ഇതിന്റെ ഫോട്ടോകൾ എടുത്ത് മാധ്യമങ്ങളിലും സോഷ്യൽ മീഡിയയിലും പങ്കുവെച്ച് നിർവൃതി അടയുകയാണ് ഉദ്യോഗസ്ഥർ. ജനങ്ങളുടെ കണ്ണിൽ പൊടിയിടാൻ വേണ്ടിയുള്ള ഇത്തരം ഫോട്ടോ സെഷനുകൾ കൊണ്ട് ദ്വീപിന്റെ നഷ്ടപ്പെടുന്ന ജൈവവൈവിധ്യം തിരിച്ചുപിടിക്കാനാകില്ലെന്ന് പരിസ്ഥിതി പ്രവർത്തകർ ഓർമ്മിപ്പിക്കുന്നു.
പ്രകൃതി സംരക്ഷണം ക്യാമറയ്ക്ക് മുന്നിലല്ല വേണ്ടത്
ആയിരക്കണക്കിന് തെങ്ങുകളും മരങ്ങളും മുറിച്ചുമാറ്റുമ്പോൾ ദ്വീപിന്റെ ആവാസവ്യവസ്ഥയ്ക്ക് ഏൽപ്പിക്കുന്ന ആഘാതം ചെറുതല്ല. കടലാക്രമണങ്ങളിൽ നിന്നും പ്രകൃതിക്ഷോഭങ്ങളിൽ നിന്നും ദ്വീപുകളെ കാത്തുസൂക്ഷിക്കുന്ന ഈ സ്വാഭാവിക മതിലുകളാണ് വികസനത്തിന്റെ പേരിൽ ഇല്ലാതാക്കുന്നത്. ഇതിനെതിരെ ശക്തമായ നിലപാടെടുക്കേണ്ട പരിസ്ഥിതി വകുപ്പ്, സ്വന്തം കടമ മറന്ന് കേവലം പ്രസ്സ് റിലീസുകളിലും ഫോട്ടോകളിലും മാത്രം ഒതുങ്ങുന്നത് തികച്ചും നിർഭാഗ്യകരമാണ്. പ്രകൃതി സംരക്ഷണം എന്നത് ക്യാമറയ്ക്ക് മുന്നിൽ കാണിക്കാനുള്ള പരസ്യമല്ല, മറിച്ച് മണ്ണിൽ നടപ്പിലാക്കേണ്ട പ്രതിബദ്ധതയാണെന്ന് അധികാരികൾ തിരിച്ചറിയേണ്ടതുണ്ട്.
ടൂറിസ്റ്റ് ഹട്ട് നിർമ്മാണം; കാഴ്ചക്കാരായി പരിസ്ഥിതി വകുപ്പ്
സി.ആർ.സെഡ് (CRZ) നിയമങ്ങളും തീരദേശ പരിപാലന മാനദണ്ഡങ്ങളും പൂർണ്ണമായും കാറ്റിൽപ്പറത്തിക്കൊണ്ടാണ് കവറത്തി വെസ്റ്റേൺ സൈഡ് ജെട്ടിക്ക് സമീപം ഭരണകൂടം ടൂറിസ്റ്റ് ഹട്ട് നിർമ്മിക്കുന്നത്. ഇത്തരം നിർണ്ണായക തീരദേശ മേഖലകളിൽ സ്ഥിരം നിർമ്മാണ പ്രവർത്തനങ്ങൾ നടത്തുന്നത് നിയമവിരുദ്ധമാണെന്നിരിക്കെ, ഭരണകൂടം തന്നെ നിയമങ്ങൾ ലംഘിക്കുന്നത് തികഞ്ഞ അനീതിയാണ്. പരമ്പരാഗതമായി പ്രദേശത്തെ മത്സ്യത്തൊഴിലാളികൾക്ക് അവരുടെ മത്സ്യബന്ധന ആവശ്യങ്ങൾക്കും കടൽ ഉപകരണങ്ങൾ സൂക്ഷിക്കുന്നതിനുമായി നീക്കിവെച്ച മണ്ണിലാണ് ഈ അനധികൃത കടന്നുകയറ്റം. തീരദേശ പരിസ്ഥിതിയെയും തനതായ സമുദ്ര ആവാസവ്യവസ്ഥയെയും ഘടനാപരമായിത്തന്നെ തകർത്തുകളയുന്ന ഇത്തരം നിർമ്മാണങ്ങൾക്കെതിരെ പ്രതികരിക്കാൻ പരിസ്ഥിതി വകുപ്പ് തയാറാകാത്തത് തികച്ചും പ്രതിഷേധാർഹമാണ്. പരിസ്ഥിതിയുടെ കാവലാളുകളായി പ്രവർത്തിക്കേണ്ട ഒരു വകുപ്പ്, ഭരണകൂടത്തിന്റെ ലംഘനങ്ങൾക്കെതിരെ മൗനം പാലിച്ച് വെറും കാഴ്ചക്കാരായി അധഃപതിക്കുന്നത് പ്രദേശവാസികളോടും പ്രകൃതിയോടുമുള്ള കടുത്ത വഞ്ചനയല്ലാതെ മറ്റൊന്നുമല്ല.
പരിസ്ഥിതിയെ സാരമായി ബാധിക്കുന്ന തരത്തിൽ ഭരണകൂടം നടത്തുന്ന മരം വെട്ടലിനും നിയമവിരുദ്ധ നിർമാണ പ്രവർത്തനങ്ങൾക്കും നേരെ കണ്ണടക്കുകയും
“Capture the Nature Conserve Tomorrow”, “Capture the beauty of our wildlife”
എന്നൊക്കെ തുടങ്ങുന്ന ശീർഷകങ്ങൾ കൊണ്ട് ഫോട്ടോഗ്രാഫി മത്സരങ്ങൾ നടത്തുകയും ചെയ്യുന്നതിലൂടെ ദ്വീപിന്റെ പ്രകൃതി സംരക്ഷിക്കപ്പെടുമോ എന്ന ചോദ്യം ഇവിടെ പ്രസക്തമാണ്!!
