കടമത്ത്: ലക്ഷദ്വീപിന്റെ കായിക മേഖലയിൽ പുതിയ ചരിത്രം കുറിച്ചുകൊണ്ട് കടമത്ത് ദ്വീപിൽ നിർമ്മിക്കുന്ന അത്യാധുനിക സ്പോർട്സ് കോംപ്ലക്സിന്റെ ശിലാസ്ഥാപനം നിർവ്വഹിച്ചു. കടമത്തിലെ വലിയ ഭൂമിയിൽ നിർമ്മിക്കുന്ന ഈ ബൃഹത് പദ്ധതി, ലക്ഷദ്വീപിലെ യുവജനങ്ങളുടെ കായിക സ്വപ്നങ്ങൾക്ക് ചിറകുമുളപ്പിക്കുന്ന ഒന്നായി മാറും. പ്രൗഢഗംഭീരമായ ചടങ്ങിൽ ലക്ഷദ്വീപ് എം.പി. അഡ്വ. ഹംദുള്ള സഈദ് സാഹിബാണ് പദ്ധതിയുടെ നിർമ്മാണോദ്ഘാടനം നിർവ്വഹിച്ചത്.
ദ്വീപിലെ യുവജനങ്ങളുടെ കായികക്ഷമതയും സർഗ്ഗവാസനകളും ഉന്നത തലങ്ങളിലേക്ക് ഉയർത്തുക എന്ന ലക്ഷ്യത്തോടെയാണ് ഈ സ്പോർട്സ് പാർക്ക് യാഥാർത്ഥ്യമാക്കുന്നത്. ഹംദുള്ളാ സഈദ് എം.പിയുടെ പ്രാദേശിക വികസന ഫണ്ടിൽ (MPLADS) നിന്ന് മൂന്ന് കോടിയിലധികം രൂപ ചെലവഴിച്ചാണ് അത്യാധുനിക സൗകര്യങ്ങളോടുകൂടിയ കായിക സമുച്ചയം ഒരുക്കുന്നത്. അന്താരാഷ്ട്ര നിലവാരത്തിലുള്ള പരിശീലന കേന്ദ്രങ്ങളും അത്ലറ്റിക് സൗകര്യങ്ങളും ഇവിടെ നിർമ്മിക്കപ്പെടും.
ദ്വീപ് നിവാസികളുടെയും കായിക പ്രേമികളുടെയും ദീർഘകാലത്തെ ആവശ്യത്തിനാണ് ഇതോടെ പരിഹാരമാകുന്നത്. പ്രാദേശികമായി പ്രതിഭ തെളിയിക്കുന്ന യുവ കായികതാരങ്ങൾക്ക് ദേശീയ-അന്തർദേശീയ തലങ്ങളിലേക്ക് ഉയർന്നു വരാനുള്ള മികച്ച വേദിയായി ഈ സ്പോർട്സ് കോംപ്ലക്സ് മാറും. പ്രദേശത്തെ കായിക മേഖലയുടെ സർവ്വതോൻമുഖമായ വികസനത്തിന് എം.പി.ലാഡ്സ് ഫണ്ട് ഉപയോഗിച്ചുള്ള ഈ പുതിയ ഉദ്യമം വലിയൊരനുഗ്രഹമാകുമെന്ന പ്രതീക്ഷയിലാണ് ദ്വീപ് ജനത.
