കവരത്തി: ലക്ഷദ്വീപിന്റെ തലസ്ഥാനമായ കവരത്തിയിൽ ഖേലോ ഇന്ത്യ പദ്ധതിയുടെ ഭാഗമായി ‘അസ്മിത’ (ASMITA) വുമൺസ് അത്ലറ്റിക്സ് ലീഗ് ആവേശകരമായി സംഘടിപ്പിച്ചു. അത്ലറ്റിക്സ് ഫെഡറേഷൻ ഓഫ് ഇന്ത്യയും (AFI) സ്പോർട്സ് അതോറിറ്റി ഓഫ് ഇന്ത്യയും (SAI) സംയുക്തമായാണ് പെൺകുട്ടികൾക്കായി ഈ കായിക മാമാങ്കം ഒരുക്കിയത്. കവരത്തി അത്ലറ്റിക്സ് അസോസിയേഷന്റെ സഹകരണത്തോടെ നടന്ന മത്സരങ്ങളിൽ അണ്ടർ-14, അണ്ടർ-16 വിഭാഗങ്ങളിലായി നിരവധി കൗമാര പ്രതിഭകൾ തങ്ങളുടെ കായികക്ഷമത തെളിയിച്ചു. പെൺകുട്ടികൾക്കിടയിൽ കായിക അവബോധം വളർത്തുന്നതിനും മികച്ച അത്ലറ്റുകളെ ദേശീയ തലത്തിലേക്ക് ഉയർത്തിക്കൊണ്ടുവരുന്നതിനുമാണ് ഈ ലീഗ് ലക്ഷ്യമിടുന്നത്.
ഒളിമ്പിക്സ് ഉൾപ്പെടെയുള്ള വലിയ കായിക വേദികളിലേക്ക് പെൺകുട്ടികളെ പ്രാപ്തരാക്കുക എന്ന ദീർഘകാല ലക്ഷ്യത്തോടെയാണ് അസ്മിത ലീഗ് വിഭാവനം ചെയ്തിരിക്കുന്നത്. കവരത്തിയിൽ നടന്ന ചടങ്ങിൽ ശ്രീ ബുസർ ജംഹർ മുഖ്യാതിഥിയായി പങ്കെടുത്തു. കായിക വകുപ്പിലെ ഉന്നത ഉദ്യോഗസ്ഥരും കായിക പ്രേമികളും പങ്കെടുത്ത ചടങ്ങിൽ വിവിധ ഇനങ്ങളിൽ വിജയികളായവർക്ക് മെഡലുകളും സർട്ടിഫിക്കറ്റുകളും വിതരണം ചെയ്തു. ഇന്ത്യയിലുടനീളം വിവിധ കേന്ദ്രങ്ങളിൽ നടന്നു വരുന്ന ഈ ലീഗ്, ലക്ഷദ്വീപിലെ പെൺകുട്ടികൾക്ക് തങ്ങളുടെ കായിക മികവ് പ്രകടിപ്പിക്കാൻ ലഭിച്ച മികച്ചൊരു അവസരമായാണ് വിലയിരുത്തപ്പെടുന്നത്.
