കൊച്ചി: ലക്ഷദ്വീപ് ഭരണകൂടത്തിന് കീഴിലുള്ള ലക്ഷദ്വീപ് വികസന കോർപ്പറേഷൻ ലിമിറ്റഡ് (LDCL), ലക്ഷദ്വീപിലെ യോഗ്യതയുള്ള കപ്പൽ ജീവനക്കാരുടെ ഒരു സമഗ്രമായ തൊഴിൽ ഡാറ്റാബേസ് തയ്യാറാക്കുന്നു. ലക്ഷദ്വീപിലെ സീമെൻമാരുടെ തൊഴിൽ സാധ്യതകൾ വർധിപ്പിക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്. തയ്യാറാക്കുന്ന ഡാറ്റാബേസ് ഇന്ത്യയിലെയും വിദേശത്തെയും പ്രമുഖ ഷിപ്പിംഗ് കമ്പനികൾക്കും മാരിടൈം സംഘടനകൾക്കും ആവശ്യാനുസരണം കൈമാറുന്നതാണ്. ഇതിലൂടെ ദ്വീപുനിവാസികൾക്ക് കപ്പൽ മേഖലയിൽ കൂടുതൽ മികച്ച തൊഴിലവസരങ്ങൾ ലഭ്യമാക്കുകയാണ് അധികൃതർ ലക്ഷ്യമിടുന്നത്.
ബോസൺ (Bosun), എസ്.എച്ച്.എം (SHM-AB), ഓർഡിനറി സീമാൻ, ഓയിലർ, ഫിറ്റർ, ജനറൽ സ്റ്റീവാർഡ്, ചീഫ് കുക്ക്, സെക്കൻഡ് കുക്ക് എന്നിങ്ങനെ വിവിധ തസ്തികകളിലേക്കാണ് അപേക്ഷകൾ ക്ഷണിച്ചിരിക്കുന്നത്. ഈ തസ്തികകളിലേക്ക് അപേക്ഷിക്കുന്നവർ ഡി.ജി ഷിപ്പിംഗ് അംഗീകരിച്ച ഇൻസ്റ്റിറ്റ്യൂട്ടുകളിൽ നിന്നുള്ള പ്രീ-സീ ട്രെയിനിംഗ്, സാധുവായ ഇന്ത്യൻ പാസ്പോർട്ട്, എസ്.ടി.സി.ഡബ്ല്യു (STCW) സർട്ടിഫിക്കേഷൻ, സി.ഡി.സി (CDC) തുടങ്ങിയ നിശ്ചിത യോഗ്യതകളും പ്രവൃത്തിപരിചയവും ഉള്ളവരായിരിക്കണം. എല്ലാ തസ്തികകളിലേക്കും അപേക്ഷിക്കാനുള്ള ഉയർന്ന പ്രായപരിധി 45 വയസ്സാണ്.
നിലവിൽ എൽ.ഡി.സി.എൽ (LDCL) റോസ്റ്ററിലോ ഡാറ്റാബേസിലോ പേര് രജിസ്റ്റർ ചെയ്തിട്ടുള്ള നാവികർ വീണ്ടും അപേക്ഷിക്കേണ്ടതില്ലെന്ന് അറിയിപ്പിൽ വ്യക്തമാക്കിയിട്ടുണ്ട്. നിശ്ചിത യോഗ്യതയുള്ള ഉദ്യോഗാർത്ഥികൾ തങ്ങളുടെ അപേക്ഷകൾ ആവശ്യമായ രേഖകളുടെ സ്വയം സാക്ഷ്യപ്പെടുത്തിയ പകർപ്പുകൾ സഹിതം അറിയിപ്പ് പ്രസിദ്ധീകരിച്ച് 30 ദിവസത്തിനുള്ളിൽ സമർപ്പിക്കേണ്ടതാണ്. കൂടുതൽ വിവരങ്ങൾക്കും അപേക്ഷാ സമർപ്പണത്തിനും കോർപ്പറേഷന്റെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
