കോഴിക്കോട്: കോഴിക്കോട് ഇൻഡോർ സ്റ്റേഡിയത്തിൽ സെപ്റ്റംബർ 27, 28 തീയതികളിലായി നടന്ന പ്രൈമൽ ഓപ്പൺ നാഷണൽ കിക്ക് ബോക്സിംഗ് ചാമ്പ്യൻഷിപ്പിൽ ലക്ഷദ്വീപ് സ്വദേശിനി ഹനിയാ ഹിദായ സ്വർണ്ണ മെഡൽ നേടി ശ്രദ്ധേയയായി. രാജ്യത്തിന്റെ വിവിധ ഭാഗങ്ങളിൽ നിന്നുള്ള പ്രമുഖ താരങ്ങളെ പിന്തള്ളിയാണ് ഈ യുവതാരം കിരീടം സ്വന്തമാക്കിയത്.
ലക്ഷദ്വീപ് ആന്ത്രോത്ത് ദ്വീപ് സ്വദേശികളായ മുഹമ്മദ് ഹിദായത്തുള്ള- കമർബാൻ ദമ്പതികളുടെ മകളാണ് ഹനിയാ ഹിദായ. തുടർച്ചയായ മികച്ച പ്രകടനങ്ങളിലൂടെയാണ് ഹനിയ കായികരംഗത്ത് തന്റേതായ ഇടം ഉറപ്പിക്കുന്നത്.
തുടർച്ചയായ നേട്ടങ്ങൾ
ദേശീയ തലത്തിലെ ഈ നേട്ടത്തിന് പുറമെ, കിക്ക് ബോക്സിംഗിലും മറ്റ് ആയോധന കലകളിലും ഹനിയ ഇതിനോടകം നിരവധി മെഡലുകൾ സ്വന്തമാക്കിയിട്ടുണ്ട്:
▪️കേരള കിക്ക് ബോക്സിംഗിൽ തുടർച്ചയായി രണ്ട് തവണയാണ് ഹനിയ സ്വർണമെഡൽ നേടിയത്.
▪️ഇരുപത്തിമൂന്നാമത് സബ് ജൂനിയർ ജില്ലാ വുഷു ചാമ്പ്യൻഷിപ്പിൽ ഗോൾഡ് മെഡലും ഒന്നാം സ്ഥാനവും കരസ്ഥമാക്കിയതും ഹനിയയുടെ മുൻകാല നേട്ടങ്ങളിൽ ഉൾപ്പെടുന്നു.
▪️സംസ്ഥാന-ദേശീയ കിക്ക് ബോക്സിംഗ് മത്സരങ്ങളിലായി ആറ് സ്വർണ്ണവും ഒരു വെള്ളിയും ഉൾപ്പെടെ ഏഴു മെഡലുകൾ ഹനിയാ ഹിദായ ഇതിനോടകം കരസ്ഥമാക്കിയിട്ടുണ്ട്.
കോഴിക്കോട് യിങ്ങ് യാങ്ങ് ക്ലബിൽ പരിശീലനം നേടുന്ന ഹനിയയുടെ ഈ വിജയം ലക്ഷദ്വീപിൽ കായികരംഗത്ത് വളർന്നു വരുന്ന യുവപ്രതിഭകൾക്ക് വലിയ പ്രചോദനമാവുകയാണ്. ദേശീയ തലത്തിൽ മെഡൽ നേടിയ താരത്തിന് സമൂഹത്തിൻ്റെ വിവിധ കോണുകളിൽ നിന്നുള്ള പ്രമുഖർ അഭിനന്ദനങ്ങൾ അറിയിച്ചു.
