കവരത്തി: ലക്ഷദ്വീപ് ബി.ജെ.പി. സംസ്ഥാന ജനറൽ സെക്രട്ടറി എച്ച്.കെ. മുഹമ്മദ് കാസിമിനെതിരായ ദേശീയപതാക അവഹേളനക്കേസിലെ ക്രിമിനൽ നടപടികൾ കേരള ഹൈക്കോടതി പൂർണമായും റദ്ദാക്കി. 2026 സെപ്റ്റംബർ 26-ന് ശനിയാഴ്ച ജസ്റ്റിസ് എ. ബദറുദ്ദീൻ പുറപ്പെടുവിച്ച ഉത്തരവിലൂടെ കവരത്തി പൊലീസ് രജിസ്റ്റർ ചെയ്ത കേസും ആന്ത്രോത്ത് ജുഡീഷ്യൽ മജിസ്ട്രേറ്റ് കോടതിയിലെ തുടർനടപടികളുമാണ് റദ്ദാക്കപ്പെട്ടത്. ‘ഹർ ഘർ തിരംഗ’ പരിപാടിക്കിടെ ഭാര്യയോടൊപ്പം എടുത്ത ചിത്രത്തിൽ കുങ്കുമനിറം താഴെയായി പതാക തലകീഴായി പ്രദർശിപ്പിച്ചു എന്നാരോപിച്ച് 2022 ഓഗസ്റ്റിലാണ് കവരത്തി പൊലീസ് കേസെടുത്തിരുന്നത്.
ദേശീയപതാകയെ അപമാനിക്കണമെന്ന ദുരുദ്ദേശത്തോടെയല്ല ചിത്രം എടുത്തതെന്നും മനഃപൂർവമല്ലാതെ സംഭവിച്ച പിഴവുകൾ കുറ്റകൃത്യത്തിന്റെ പരിധിയിൽ വരില്ലെന്നും ഹൈക്കോടതി നിരീക്ഷിച്ചു. ലക്ഷദ്വീപിലെ ബി.ജെ.പി. പ്രവർത്തകരുടെ സ്വകാര്യ വാട്സ്ആപ്പ് ഗ്രൂപ്പിലാണ് ചിത്രം പങ്കുവെച്ചതെങ്കിലും സാഹചര്യങ്ങൾക്കനുസരിച്ച് ഇത്തരം ഗ്രൂപ്പുകൾക്കും ‘പൊതുജന കാഴ്ച’ (public view) എന്ന തത്വം ബാധകമായേക്കാമെന്നും കോടതി വ്യക്തമാക്കി. എങ്കിലും കേസിൽ കാസിമിന് കുറ്റകരമായ ഉദ്ദേശ്യമില്ലെന്ന് വ്യക്തമായതോടെയാണ് എല്ലാ ക്രിമിനൽ നടപടികളും കോടതി അവസാനിപ്പിച്ചത്.
ഇതിനുപുറമേ, സി.ബി.ഐ. രജിസ്റ്റർ ചെയ്ത മറ്റൊരു അഴിമതിക്കേസിലും കവരത്തി സി.ബി.ഐ. സ്പെഷ്യൽ കോടതി മുഹമ്മദ് കാസിമിനെ സെപ്റ്റംബർ 15-ന് കുറ്റവിമുക്തനാക്കിയിരുന്നു. കവരത്തി സെൻട്രൽ ലൈബ്രറി ഓഡിറ്റോറിയം നിർമാണവുമായി ബന്ധപ്പെട്ട് ₹38.84 ലക്ഷത്തിന്റെ സാമ്പത്തിക നഷ്ടവും ക്രമക്കേടും ആരോപിച്ചായിരുന്നു സി.ബി.ഐ. കേസ് ചുമത്തിയിരുന്നത്. എന്നാൽ കാസിമിനും മറ്റ് പ്രതികൾക്കും എതിരെ ഗൂഢാലോചനയോ സാമ്പത്തിക തട്ടിപ്പോ സംശയാതീതമായി തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് കണ്ടെത്തിയാണ് സി.ബി.ഐ. കോടതി അദ്ദേഹത്തെ വെറുതെ വിട്ടത്.
ദേശീയപതാകയുമായി ബന്ധപ്പെട്ട കേസിലും സി.ബി.ഐ. കേസിലും എച്ച്.കെ. മുഹമ്മദ് കാസിമിന് വേണ്ടി അഡ്വ. അജിത് ജി. അഞ്ചർലേക്കർ ഹാജരായപ്പോൾ, സി.ബി.ഐ. കേസിൽ പ്രതിയായ മുൻ എൽ.പി.ഡബ്ല്യു.ഡി. ഉദ്യോഗസ്ഥൻ എസ്. ആറ്റക്കോയയ്ക്ക് വേണ്ടി അഡ്വ. ആലികോയയാണ് ഹാജരായത്. തുടർച്ചയായി അനുകൂല വിധികൾ വന്നതോടെ നിയമപോരാട്ടങ്ങളിൽ വലിയ ആശ്വാസമാണ് ബി.ജെ.പി. സംസ്ഥാന ജനറൽ സെക്രട്ടറിക്ക് ലഭിച്ചിരിക്കുന്നത്.
