അഗത്തി: ലക്ഷദ്വീപിലേക്ക് നേരിട്ടുള്ള വിനോദസഞ്ചാര പാക്കേജുകൾ അവതരിപ്പിക്കുന്നതിനായി പ്രമുഖ ഓൺലൈൻ യാത്രാ പ്ലാറ്റ്ഫോമായ മേക്ക്മൈട്രിപ്പ് (MakeMyTrip), റീജിയണൽ എയർലൈനായ ഫ്ലൈ91 (FLY91)-മായി കൈകോർക്കുന്നു.
വരുന്ന വിനോദസഞ്ചാര സീസൺ കണക്കിലെടുത്ത് 2026 നവംബർ 12 മുതൽ 2027 ജനുവരി പകുതി വരെ ബെംഗളൂരുവിൽ നിന്ന് അഗത്തിയിലേക്ക് നാല് ദിവസത്തിലൊരിക്കൽ നേരിട്ട് വിമാന സർവീസുകൾ ലഭ്യമാകും. നാല് ദിവസവും മൂന്ന് രാത്രിയും അടങ്ങുന്ന പാക്കേജിന് ഒരു വ്യക്തിക്ക് 84,898 രൂപ മുതലാണ് നിരക്ക് ആരംഭിക്കുന്നത്. മടക്കയാത്രാ വിമാന ടിക്കറ്റ്, ലക്ഷദ്വീപ് പ്രവേശന പെർമിറ്റ്, താമസം, ഭക്ഷണം, ഗ്രൗണ്ട് ആക്റ്റിവിറ്റികൾ, ടൂർ മാനേജറുടെ സേവനം എന്നിവയെല്ലാം ഉൾപ്പെടുന്നതാണ് ഈ പാക്കേജ്. കൂടാതെ സഞ്ചാരികൾക്ക് സ്നോർക്കെല്ലിംഗ്, സ്കൂബ ഡൈവിംഗ്, ആമകളെ കാണൽ, യോഗ, മെഡിറ്റേഷൻ തുടങ്ങിയവ അധിക തുക നൽകി മുൻകൂട്ടി ബുക്ക് ചെയ്യാനും അവസരമുണ്ട്.
ബെംഗളൂരുവിനെ മറ്റ് പ്രമുഖ നഗരങ്ങളുമായി എളുപ്പത്തിൽ ബന്ധിപ്പിക്കാൻ സാധിക്കുന്നതിനാൽ, രാജ്യത്തുടനീളമുള്ള സഞ്ചാരികൾക്ക് ലക്ഷദ്വീപിലേക്കുള്ള പ്രധാന കവാടമായി ബെംഗളൂരു മാറും. പുതിയ യാത്രാ സൗകര്യങ്ങൾ വർധിക്കുന്നതോടെ ലക്ഷദ്വീപ് വിനോദസഞ്ചാര മേഖലയ്ക്ക് ഇത് വലിയൊരു മുന്നേറ്റമാകുമെന്നാണ് കരുതപ്പെടുന്നത്.
