കവരത്തി: ലക്ഷദ്വീപ് ഉൾപ്പെടെയുള്ള രാജ്യത്തിന്റെ പടിഞ്ഞാറൻ തീരങ്ങളിൽ ജൂൺ 1 മുതൽ മത്സ്യബന്ധനത്തിന് നിരോധനം ഏർപ്പെടുത്തിക്കൊണ്ട് കേന്ദ്ര സർക്കാർ ഉത്തരവിറക്കി. 2026 ജൂൺ 1 മുതൽ ജൂലൈ 31 വരെ 61 ദിവസത്തേക്കാണ് നിയന്ത്രണം ഏർപ്പെടുത്തിയിരിക്കുന്നത്. കടൽ വിഭവങ്ങളുടെ സംരക്ഷണവും കാര്യക്ഷമമായ പരിപാലനവും ലക്ഷ്യമിട്ടാണ് ഈ നടപടി. ഇന്ത്യൻ എക്സ്ക്ലൂസീവ് ഇക്കണോമിക് സോണിലെ (EEZ) ടെറിട്ടോറിയൽ വാട്ടേഴ്സിന് അപ്പുറമുള്ള ഭാഗങ്ങളിലാണ് ഈ നിരോധനം ബാധകമാകുക.
ലക്ഷദ്വീപ് ഭരണകൂടത്തിന് കീഴിലുള്ള ഫിഷറീസ് ഡയറക്ടറേറ്റ് പുറത്തിറക്കിയ സർക്കുലർ പ്രകാരം, യന്ത്രവൽകൃത ബോട്ടുകൾക്കും കപ്പലുകൾക്കും ഈ കാലയളവിൽ മത്സ്യബന്ധനത്തിന് അനുമതി ഉണ്ടായിരിക്കില്ല. എന്നാൽ പരമ്പരാഗത രീതിയിൽ മോട്ടോർ ഘടിപ്പിക്കാത്ത വള്ളങ്ങൾ ഉപയോഗിച്ച് നടത്തുന്ന മത്സ്യബന്ധനത്തെ ഈ നിരോധനത്തിൽ നിന്നും ഒഴിവാക്കിയിട്ടുണ്ട്. നിയമം ലംഘിക്കുന്നവർക്കെതിരെ കർശന നടപടി സ്വീകരിക്കാൻ ഫിഷറീസ് വകുപ്പ് ഉദ്യോഗസ്ഥർക്കും കോസ്റ്റ് ഗാർഡിനും നിർദ്ദേശം നൽകിയിട്ടുണ്ട്. കാലാവസ്ഥാ വ്യതിയാനവും കടൽ സുരക്ഷയും പരിഗണിച്ചാണ് ഈ വാർഷിക നിരോധനം നടപ്പിലാക്കുന്നത്.
