കവരത്തി: അഗത്തി ദ്വീപിൽ നിന്നും ബംഗാരം, തിണ്ണകര എന്നീ ദ്വീപുകളിലേക്കുള്ള ബോട്ട് ഗതാഗതം തടസ്സപ്പെട്ടതിനെത്തുടർന്ന് പ്രദേശവാസികൾ നേരിടുന്ന രൂക്ഷമായ പ്രതിസന്ധി പരിഹരിക്കണമെന്ന് ആവശ്യപ്പെട്ട് ലക്ഷദ്വീപ് എം.പി. ഹംദുള്ള സഈദ് അഡ്മിനിസ്ട്രേറ്ററുടെ അഡ്വൈസർ ദീപക് കുമാറിന് കത്തയച്ചു. ലക്ഷദ്വീപിലെ പ്രമുഖ വിനോദസഞ്ചാര കേന്ദ്രങ്ങളായ ഈ ദ്വീപുകളിലേക്കുള്ള യാത്രാസൗകര്യം നിലച്ചത് ടൂറിസം മേഖലയെയും അനുബന്ധ തൊഴിലവസരങ്ങളെയും ദോഷകരമായി ബാധിച്ചിരിക്കുകയാണെന്ന് അദ്ദേഹം കത്തിൽ ചൂണ്ടിക്കാട്ടി. അഗത്തിയിൽ നിന്നുള്ള നിയന്ത്രിത ബോട്ട് സർവീസുകൾ പുനഃസ്ഥാപിക്കുന്നത് പ്രദേശത്തെ സാമ്പത്തിക പ്രവർത്തനങ്ങൾ സുഗമമായി മുന്നോട്ട് കൊണ്ടുപോകുന്നതിന് അത്യന്താപേക്ഷിതമാണെന്നും അദ്ദേഹം ഓർമ്മിപ്പിച്ചു.
ദ്വീപ് നിവാസികളായ നിരവധി കുടുംബങ്ങളുടെ പ്രധാന വരുമാന സ്രോതസ്സാണ് ബോട്ട് സർവീസുകൾ നിലച്ചതോടെ അനിശ്ചിതത്വത്തിലായിരിക്കുന്നത്. ബോട്ടുടമകൾ, ടൂറിസം സേവനദാതാക്കൾ, ഹോംസ്റ്റേ ഓപ്പറേറ്റർമാർ എന്നിവർ ഈ വിഷയത്തിൽ വലിയ ആശങ്ക രേഖപ്പെടുത്തിയിട്ടുണ്ട്. ഗതാഗത സൗകര്യം ദീർഘകാലത്തേക്ക് തടസ്സപ്പെടുന്നത് പ്രാദേശിക ടൂറിസം മേഖലയുടെ തകർച്ചയ്ക്കും ജനങ്ങളുടെ ഉപജീവനമാർഗ്ഗം ഇല്ലാതാകുന്നതിനും കാരണമാകുമെന്ന് എം.പി. വ്യക്തമാക്കി. തന്റെ ദ്വീപ് സന്ദർശന വേളയിൽ നേരിട്ട് ബോധ്യപ്പെട്ട ഈ പരാതികൾ അടിയന്തരമായി പരിഗണിക്കണമെന്നും പ്രശ്നത്തിന് എത്രയും വേഗം ശാശ്വതമായ പരിഹാരം കാണണമെന്നും അദ്ദേഹം അഡ്മിനിസ്ട്രേഷനോട് ആവശ്യപ്പെട്ടു.
