കവരത്തി: കവരത്തി ദ്വീപിലെ പവർ ഹൗസിലുള്ള പുതിയ 1500KVA കമ്മിൻസ് (Cummins) ജനറേറ്ററിന്റെ അടിയന്തര അറ്റകുറ്റപ്പണികൾ നടത്തുന്നതിനാൽ നാളെ (03-02-2026) ദ്വീപിൽ ഭാഗികമായി വൈദ്യുതി തടസ്സം നേരിടുമെന്ന് വൈദ്യുതി വകുപ്പ് അറിയിച്ചു. രാവിലെ 09:00 മണി മുതൽ വൈകുന്നേരം 05:00 മണി വരെയാണ് വൈദ്യുതി നിയന്ത്രണം ഏർപ്പെടുത്തിയിരിക്കുന്നത്. മെച്ചപ്പെട്ട സേവനം ഉറപ്പുവരുത്തുന്നതിനായി നടത്തുന്ന ഈ പ്രവർത്തനങ്ങളുമായി പൊതുജനങ്ങൾ പൂർണ്ണമായും സഹകരിക്കണമെന്ന് അസിസ്റ്റന്റ് എൻജിനീയർ അൻവർ സാദത്ത് അറിയിച്ചു.
വൈദ്യുതി വിതരണം സുഗമമായി നിലനിർത്തുന്നതിനായി ഉപഭോക്താക്കൾ നിയന്ത്രണങ്ങൾ പാലിക്കണമെന്ന് വകുപ്പ് നിർദ്ദേശിച്ചു. എയർ കണ്ടീഷണറുകൾ, മോട്ടോറുകൾ തുടങ്ങിയ വലിയ തോതിൽ വൈദ്യുതി ഉപയോഗിക്കുന്ന ഉപകരണങ്ങൾ ഈ സമയത്ത് ഒഴിവാക്കേണ്ടതാണ്. അനാവശ്യമായ ലൈറ്റുകൾ അണച്ചും അത്യാവശ്യത്തിന് മാത്രം വൈദ്യുതി ഉപയോഗിച്ചും ലോഡ് കുറയ്ക്കാൻ ശ്രദ്ധിക്കണം. കൂടാതെ, വോൾട്ടേജ് വ്യതിയാനം മൂലമുണ്ടാകുന്ന തകരാറുകൾ ഒഴിവാക്കാൻ സെൻസിറ്റീവ് ആയ ഇലക്ട്രോണിക് ഉപകരണങ്ങൾ പ്ലഗ് ഔട്ട് ചെയ്യണമെന്നും അറിയിപ്പിൽ പറയുന്നു. അറ്റകുറ്റപ്പണികൾ മൂലമുണ്ടാകുന്ന ബുദ്ധിമുട്ടുകളിൽ വൈദ്യുതി വകുപ്പ് ഖേദം പ്രകടിപ്പിച്ചു.
