കൊച്ചി: കിൽത്താൻ ദ്വീപിന് അഭിമാനമുഹൂർത്തമായി സമുദ്രമേഖലയിലെ ഉയർന്ന പ്രൊഫഷണൽ യോഗ്യത സ്വന്തമാക്കി സബീർ. മാസ്റ്റേഴ്‌സ് പരീക്ഷ വിജയകരമായി പൂർത്തിയാക്കിയാണ് കിൽത്താൻ സ്വദേശിയായ സബീർ കപ്പൽ ക്യാപ്റ്റൻ പദവിയിലേക്ക് ഉയർന്നിരിക്കുന്നത്. കഠിനാധ്വാനവും നിരന്തര പരിശ്രമവും കൈമുതലാക്കി നേടിയ ഈ വിജയം കിൽത്താൻ ദ്വീപിനും ലക്ഷദ്വീപിനും ഒരുപോലെ വലിയ അഭിമാനമായി മാറിയിരിക്കുകയാണ്.
കഴിഞ്ഞ കുറേ വർഷങ്ങളായി ലക്ഷദ്വീപ് കപ്പലുകളിൽ ചീഫ് ഓഫീസറായി സേവനമനുഷ്ഠിച്ചു വരികയായിരുന്നു സബീർ. ഈ കാലയളവിൽ ഒപ്പമുണ്ടായിരുന്ന ഒട്ടനവധി യുവ നാവികർക്ക് അച്ചടക്കവും പ്രൊഫഷണൽ പരിശീലനവും പകർന്നുനൽകാൻ അദ്ദേഹത്തിന് സാധിച്ചിട്ടുണ്ട്. ഈ രംഗത്തെ അദ്ദേഹത്തിന്റെ അനുഭവസമ്പത്തും അർപ്പണബോധവും പുതുതലമുറയ്ക്ക് വലിയൊരു മാതൃകയാണ്.
സബീറിന്റെ ഈ ഉന്നത നേട്ടത്തിൽ കുടുംബാംഗങ്ങൾക്കും സുഹൃത്തുക്കൾക്കും നാട്ടുകാർക്കും വലിയ സന്തോഷമാണ് ഉള്ളത്. ലക്ഷദ്വീപിലെ യുവതലമുറയ്ക്ക് പ്രചോദനമാകുന്ന ഈ അഭിമാനാർഹമായ നേട്ടത്തിന് സമൂഹത്തിന്റെ വിവിധ മേഖലകളിൽ നിന്നുള്ള നിരവധി പ്രമുഖരാണ് അഭിനന്ദനങ്ങൾ നേർന്നിരിക്കുന്നത്.
