കവറത്തി: ലക്ഷദ്വീപ് ദ്വീപസമൂഹങ്ങളിൽ ഇടിമിന്നലോടും മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ വീശിയടിച്ചേക്കാവുന്ന കാറ്റോടും കൂടിയ ശക്തമായ കാലാവസ്ഥയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (IMD) മുന്നറിയിപ്പ് നൽകി. ഇതിന്റെ അടിസ്ഥാനത്തിൽ 2026 ഒക്ടോബർ 11 വരെ ദ്വീപിൽ യെല്ലോ അലർട്ട് പ്രഖ്യാപിച്ചിരിക്കുകയാണ്. ജനങ്ങൾ ആവശ്യമായ മുൻകരുതലുകൾ സ്വീകരിക്കണമെന്ന് ജില്ലാ ദുരന്തനിവാരണ അതോറിറ്റി (DDMA) അഡീഷണൽ ജില്ലാ മജിസ്‌ട്രേറ്റും സി.ഇ.ഒയുമായ ജഗ്ദീഷ് ശർമ്മ നിർദേശിച്ചു.
മോശം കാലാവസ്ഥ മുൻനിർത്തി പൊതുജനങ്ങൾക്കായി പ്രത്യേക ജാഗ്രതാ നിർദേശങ്ങൾ കളക്ടറേറ്റ് പുറപ്പെടുവിച്ചിട്ടുണ്ട്. ഇടിയോ മിന്നലോ ഉണ്ടാകുന്ന സമയത്ത് എല്ലാവരും സുരക്ഷിതമായ കെട്ടിടങ്ങൾക്കുള്ളിലേക്ക് മാറേണ്ടതാണ്. ജനലുകളും വാതിലുകളും അടച്ചിടാനും ചുവരുകളിലോ തറയിലോ തൊടുന്നത് ഒഴിവാക്കാനും നിർദേശമുണ്ട്. കൂടാതെ, ഇടിമിന്നലുള്ള സമയത്ത് വൈദ്യുതോപകരണങ്ങൾ പ്രവർത്തിപ്പിക്കരുതെന്നും അവയുടെ പ്ലഗ്ഗുകൾ അഴിച്ചുമാറ്റണമെന്നും അതോറിറ്റി അറിയിച്ചു.
തുറസ്സായ സ്ഥലങ്ങളിലും ടെറസുകളിലും നിൽക്കുന്നതും കളിക്കുന്നതും പൂർണ്ണമായി ഒഴിവാക്കണം. ഇടിമിന്നലുള്ളപ്പോൾ മരങ്ങളുടെ ചുവട്ടിൽ അഭയം തേടാനോ വാഹനങ്ങൾ നിർത്തിയിടാനോ പാടില്ല. കടലിൽ പോകുന്നവർ, മീൻപിടുത്തക്കാർ, നീന്തൽ-ബോട്ടിംഗ് വിനോദങ്ങളിൽ ഏർപ്പെടുന്നവർ എന്നിവർ പ്രത്യേക ശ്രദ്ധ പുലർത്തണം. ആകാശം കറുത്തു ഇരുളുന്ന ഘട്ടത്തിൽ തന്നെ കടലിലെ പ്രവർത്തനങ്ങൾ അവസാനിപ്പിച്ച് അടുത്തുള്ള തീരത്തേക്ക് മടങ്ങണമെന്ന് നിർദേശത്തിൽ വ്യക്തമാക്കുന്നു. നിർദേശങ്ങൾ ജനങ്ങളിലേക്ക് വേഗത്തിൽ എത്തിക്കാൻ എല്ലാ ഡെപ്യൂട്ടി കളക്ടർമാർക്കും ബ്ലോക്ക് വികസന ഉദ്യോഗസ്ഥർക്കും ആകാശവാണി കവറത്തി നിലയത്തിനും ഭരണകൂടം നിർദേശം നൽകിയിട്ടുണ്ട്.
