കവരത്തി: ലക്ഷദ്വീപ് ഭരണകൂടം നിലവിൽ നടപ്പാക്കിവരുന്ന ഭരണപരിഷ്കാരങ്ങളും സർക്കാർ ജീവനക്കാരുടെ പുനർവിന്യാസ നടപടികളും താൽക്കാലികമായി തടഞ്ഞുവെക്കണമെന്ന് ആവശ്യപ്പെട്ട് ലക്ഷദ്വീപ് ഗവൺമെന്റ് എംപ്ലോയീസ് യൂണിയൻ (LGEU) രംഗത്തെത്തി. പുതിയ തീരുമാനങ്ങൾ ജീവനക്കാരുടെ അവകാശങ്ങളെയും ക്ഷേമത്തെയും ദോഷകരമായി ബാധിക്കുമെന്നും അംഗീകൃത സ്ഥലംമാറ്റ നയങ്ങൾക്ക് വിരുദ്ധമാണെന്നും ചൂണ്ടിക്കാട്ടി യൂണിയൻ ഭരണകൂടത്തിന് ഔദ്യോഗികമായി നിവേദനം സമർപ്പിച്ചു.
വിവിധ മന്ത്രാലയ വിഭാഗങ്ങളിലെ ജീവനക്കാരെ അതത് വകുപ്പുകളിൽനിന്ന് മാറ്റി സെക്രട്ടേറിയറ്റിന് കീഴിൽ കേന്ദ്രീകരിക്കാനുള്ള നീക്കമാണ് സംഘടനയുടെ പ്രധാന എതിർപ്പിന് കാരണം. ഈ പരിഷ്കാരം നടപ്പിലായാൽ വിവിധ ദ്വീപുകളിലെ സർക്കാർ ഓഫീസുകളുടെ ദൈനംദിന പ്രവർത്തനം താളംതെറ്റുകയും ജീവനക്കാർക്ക് അമിത ജോലിഭാരം നേരിടേണ്ടിവരുകയും ചെയ്യുമെന്ന് യൂണിയൻ നിവേദനത്തിൽ വ്യക്തമാക്കുന്നു. കൂടാതെ, പുതിയ പൊതു സ്ഥലംമാറ്റ ഉത്തരവ് നിലവിലുള്ള സ്ഥലംമാറ്റ മാർഗ്ഗനിർദ്ദേശങ്ങൾക്ക് നിരക്കാത്തതാണെന്നും, ഭൂമിശാസ്ത്രപരമായ പ്രതിസന്ധികൾ പരിഗണിച്ച് സ്വന്തം ദ്വീപുകളിൽ ജോലി ചെയ്യാനും കുടുംബപരമായ സാഹചര്യങ്ങൾക്ക് മുൻഗണന നൽകാനുമുള്ള അവസരം ഉറപ്പാക്കണമെന്നും നിവേദനത്തിൽ പറയുന്നു.
ചില ജീവനക്കാരെ നിർബന്ധിതമായി വിരമിക്കൽ വ്യവസ്ഥയായ FR 56(J) ഉപയോഗിച്ച് നീക്കം ചെയ്തതിലും, മുൻകൂർ മുന്നറിയിപ്പോ പ്രതികൂലമായ സർവീസ് രേഖകളോ ഇല്ലാതെ നിരവധി സ്ഥിരം ജീവനക്കാരെ സ്ഥലംമാറ്റിയതിലും യൂണിയൻ കടുത്ത പ്രതിഷേധം രേഖപ്പെടുത്തി. അവസാന നിമിഷത്തെ സ്ഥലംമാറ്റങ്ങൾ കാരണം പത്താം ക്ലാസ്, പ്ലസ് ടു പൊതുപരീക്ഷകൾക്ക് തയ്യാറെടുക്കുന്ന വിദ്യാർത്ഥികളുടെ പരീക്ഷാകേന്ദ്രങ്ങൾ മാറ്റുന്നതിലുണ്ടാകുന്ന ബുദ്ധിമുട്ടുകൾ ചൂണ്ടിക്കാട്ടി, കുട്ടികളുടെ ഭാവി മുൻനിർത്തി മാനുഷികമായ സമീപനം സ്വീകരിക്കണമെന്നും യൂണിയൻ അഭ്യർത്ഥിച്ചു.
അവധിയനുമതി, മെഡിക്കൽ അഡ്വാൻസ്, സർവീസ് ബുക്ക് പുതുക്കൽ, സാമ്പത്തിക അക്കൗണ്ട് പരിപാലനം തുടങ്ങിയ ഭരണനടപടികൾ തടസ്സപ്പെടുമെന്ന മുന്നറിയിപ്പിനൊപ്പം, ഉയർന്ന തസ്തികകളിൽ യോഗ്യരായവരെ ഒഴിവാക്കി ജൂനിയർ ജീവനക്കാരെ നിയമിക്കുന്നത് സ്ഥാനക്കയറ്റ സാധ്യതകളെ ഇല്ലാതാക്കുന്നുവെന്നും ആരോപണമുണ്ട്. ഈ സാഹചര്യത്തിൽ പുതിയ ഉത്തരവുകൾ മരവിപ്പിക്കുക, സ്ഥലംമാറ്റ നയം കർശനമായി പാലിക്കുക, യോഗ്യരായ ജീവനക്കാരെ ഉപയോഗിച്ച് ഒഴിവുകൾ നികത്തുക, അത്യാവശ്യ നിയമനങ്ങൾ നടത്തുക, അംഗീകൃത യൂണിയനുകളുമായി ചർച്ച നടത്തി പ്രശ്നങ്ങൾ പരിഹരിക്കുക എന്നീ അഞ്ച് പ്രധാന ആവശ്യങ്ങളാണ് യൂണിയൻ ഭരണകൂടത്തിന് മുന്നിൽ വെച്ചിരിക്കുന്നത്.
