കവരത്തി: ഈ വർഷം തായ്‌ലൻഡിൽ വെച്ച് നടത്തപ്പെടുന്ന എ.എഫ്.സി ബീച്ച് സോക്കർ ഏഷ്യൻ കപ്പ് മത്സരങ്ങൾക്കുള്ള ദേശീയ ടീം പ്രഖ്യാപിച്ചു. കവരത്തി ദ്വീപ് സ്വദേശി മുഹമ്മദ് അക്രം ദേശീയ ജേഴ്സി അണിഞ്ഞ് കളിക്കളത്തിൽ ഉണ്ടാകും. ആദ്യമായാണ് ദേശീയ ഫുട്ബോൾ ടീമിൽ ലക്ഷദ്വീപിൽ നിന്നും ഒരു താരം പങ്കെടുക്കുന്നത്. ലക്ഷദ്വീപിൽ നിന്നും പത്ത് താരങ്ങൾ വിവിധ ഘട്ടങ്ങളിലായി നടന്ന സെലക്ഷൻ ക്യാമ്പുകളിൽ പങ്കെടുത്തിരുന്നു. പന്ത്രണ്ട് സംസ്ഥാനങ്ങളിൽ നിന്നായി 75 താരങ്ങളാണ് വിവിധ ഘട്ടങ്ങളിലായി നടന്ന സെലക്ഷൻ ക്യാമ്പുകളിൽ പങ്കെടുത്തത്. ഗുജറാത്തിലെ പോർബന്ദറിൽ നടന്ന സെലക്ഷൻ ട്രയൽസിൽ ലക്ഷദ്വീപിൽ നിന്നും പത്ത് താരങ്ങൾ പങ്കെടുത്തിരുന്നു. ഈ ക്യാമ്പിൽ നിന്നും തിരഞ്ഞെടുക്കപ്പെട്ട നമ്മുടെ മികച്ച നാല് താരങ്ങളാണ് അടുത്തിടെ നടന്ന അസാന റൗണ്ട് ദേശീയ സെലക്ഷൻ ക്യാമ്പിൽ പങ്കെടുത്തത്. ഈ ക്യാമ്പിലാണ് കവരത്തി ദ്വീപ് സ്വദേശി മുഹമ്മദ് അക്രം ദേശീയ ബീച്ച് ഫുട്ബോൾ ടീമീലേക്ക് തിരഞ്ഞെടുക്കപ്പെട്ടത്.
തിരഞ്ഞെടുക്കപ്പെട്ട 12 പേരാണ് ഏഷ്യൻ കപ്പിനുള്ള യോഗ്യതാ മത്സരത്തിൽ തായ്‌ലൻഡിൽ പങ്കെടുക്കുക. തായ്‌ലൻഡിൽ നടക്കുന്ന ഏഷ്യൻ കപ്പിൽ കുവൈത്ത്, ലെബനാൻ, തായ്‌ലൻഡ് എന്നീ രാജ്യങ്ങളാണ് ഇന്ത്യയോടൊപ്പം (ഗ്രൂപ്പ് എ) ആദ്യ റൗണ്ടിൽ മത്സരിക്കുന്നത്.
