കടമത്ത്: അധ്യാപക നിയമനവും കോഴ്‌സുകളുടെ അനിശ്ചിതത്വവും പരിഹരിക്കണമെന്നാവശ്യപ്പെട്ട് കടമത്ത് ഗവൺമെന്റ് കോളേജിലെ വിദ്യാർത്ഥികളും രക്ഷിതാക്കളും നടത്തുന്ന പ്രക്ഷോഭം ലക്ഷദ്വീപിൽ വൻ രാഷ്ട്രീയ കൊടുങ്കാറ്റിന് തിരികൊളുത്തിയിരിക്കുന്നു. സമരവുമായി ബന്ധപ്പെട്ട് എം.പി. അഡ്വ. ഹംദുള്ളാ സഈദ്, കോൺഗ്രസ്-എൻ.സി.പി നേതാക്കൾ എന്നിവരുടെ നേതൃത്വത്തിൽ വിദ്യാർത്ഥികളും രക്ഷിതാക്കളും ചേർന്ന് അധികൃതരുമായി ചർച്ചകൾ നടന്നു. എൻ.സി.പി. (എസ്.പി) മുൻ സംസ്ഥാന പ്രസിഡന്റ് അബ്ദുൽ മുത്തലിബ്, കടമത്ത് വിഷൻ പ്രതിനിധി സാദിഖ് എന്നിവരുൾപ്പെടെയുള്ള പ്രദേശവാസികളും ജനപ്രതിനിധികളും യോഗത്തിൽ പങ്കെടുത്തു.
ചർച്ചയ്ക്കിടെ ലക്ഷദ്വീപ് അഡ്മിനിസ്ട്രേറ്റർ പ്രഫുൽ ഖോഡ പട്ടേലുമായി സംസാരിച്ച കാര്യം എം.പി. യോഗത്തെ അറിയിച്ചു. പണ്ടാരം ഭൂമി തർക്കങ്ങളുമായി ബന്ധപ്പെട്ട് ജനങ്ങൾ നൽകിയിട്ടുള്ള കേസുകൾ ഉൾപ്പെടെ ഭരണകൂടത്തിനെതിരായ കേസുകൾ പിൻവലിക്കുകയും, ദ്വീപിൽ ടൂറിസം വികസനത്തിനായി ഭൂമി വിട്ടുനൽകാൻ തയ്യാറാവുകയും ചെയ്താൽ അധ്യാപകരെ നിയമിക്കാനും ഉന്നയിച്ച ആവശ്യങ്ങൾ അംഗീകരിക്കാനും അഡ്മിനിസ്ട്രേറ്റർ സന്നദ്ധനാണെന്ന എം.പി.യുടെ വെളിപ്പെടുത്തൽ വൻ പ്രതിഷേധത്തിനാണ് വഴിവെച്ചത്. അഡ്മിനിസ്ട്രേഷന്റെ ആവശ്യങ്ങൾക്ക് വഴങ്ങാൻ തങ്ങൾ തയ്യാറല്ലെന്ന് അബ്ദുൽ മുത്തലിബും ജനങ്ങളും യോഗത്തിൽ തറപ്പിച്ചുപറഞ്ഞു. സമരം തുടരാനും അഡ്മിനിസ്ട്രേറ്ററുടെ ഇത്തരം നിബന്ധനകൾക്ക് മുന്നിൽ മുട്ടുമടക്കില്ലെന്നും ജനങ്ങൾ വ്യക്തമാക്കി.
ഭൂമി വിട്ടുനൽകിയാൽ മാത്രമേ ആവശ്യങ്ങൾ പരിഗണിക്കപ്പെടൂ എന്നും അധികൃതർ പറയുന്നത് കേൾക്കാൻ ജനങ്ങൾ തയ്യാറാകണമെന്നുമുള്ള എം.പി.യുടെ നിലപാടിനെതിരെ രൂക്ഷമായ പ്രതികരണമാണ് സമരക്കാരിൽ നിന്നുണ്ടായത്. കർഷക പ്രക്ഷോഭത്തിന് മുന്നിൽ പ്രധാനമന്ത്രി നരേന്ദ്ര മോദിക്ക് പോലും മുട്ടുമടക്കേണ്ടി വന്നിട്ടുണ്ടെന്നും, ഐക്യത്തോടെ പോരാടിയാൽ പ്രഫുൽ ഖോഡ പട്ടേലും ജനവികാരത്തിന് മുന്നിൽ വഴങ്ങുമെന്നും യോഗത്തിലുണ്ടായിരുന്നവർ ഓർമ്മിപ്പിച്ചു. രാഷ്ട്രീയം നോക്കാതെ എം.പി. എന്ന നിലയിൽ സമരത്തിന് മുന്നിൽ നിന്ന് ആഹ്വാനം നൽകിയാൽ ജനങ്ങൾ പൂർണ്ണ പിന്തുണ നൽകുമെന്ന് അബ്ദുൽ മുത്തലിബ് വ്യക്തമാക്കിയെങ്കിലും, സമരം ചെയ്താൽ കേസിൽ പെടാൻ സാധ്യതയുണ്ടെന്നും ജാമ്യമില്ലാ വകുപ്പുകൾ ചുമത്തപ്പെടുമെന്നുമുള്ള മുന്നറിയിപ്പാണ് എം.പി. വിദ്യാർത്ഥികൾക്ക് നൽകിയത്.
എന്നാൽ, തങ്ങൾ ന്യായമായ ആവശ്യങ്ങൾക്കാണ് പോരാടുന്നതെന്നും അതിന് വേണ്ടി എത്ര വലിയ പ്രത്യാഘാതങ്ങൾ നേരിടാനും സന്നദ്ധരാണെന്നും വിദ്യാർത്ഥികളും പ്രാദേശിക നേതാക്കളും വ്യക്തമാക്കി. അഡ്മിനിസ്ട്രേഷന്റെ ഭാഗത്തുനിന്ന് എന്ത് നടപടിയുണ്ടായാലും നേരിടാൻ തയ്യാറാണെന്ന് കടമത്ത് വിഷൻ പ്രതിനിധി സാദിഖ് വ്യക്തമാക്കി. വിദ്യാർത്ഥികളുടെ വിദ്യാഭ്യാസ അവകാശങ്ങൾക്ക് വേണ്ടിയുള്ള സമരത്തിൽ, അഡ്മിനിസ്ട്രേഷന്റെ ഭൂമി പിടിച്ചെടുക്കൽ അജണ്ടയെ ന്യായീകരിക്കുന്ന രീതിയിൽ സംസാരിച്ച എം.പി.യുടെ നിലപാടിൽ വലിയ പ്രതിഷേധവും അമർഷവും ദ്വീപ് ജനതയ്ക്കിടയിൽ പുകയുകയാണ്. വിദ്യാർത്ഥികളുടെ അവകാശങ്ങൾ വെച്ചുമാറി ഭൂമി കൈക്കലാക്കാനുള്ള അഡ്മിനിസ്ട്രേഷന്റെ നീക്കത്തിനെതിരെ കടമത്ത് ദ്വീപിലെ ജനങ്ങൾ ഒന്നിച്ച് അണിനിരന്ന് സമരം ശക്തമാക്കാനാണ് തീരുമാനം.
