കവരത്തി: ലക്ഷദ്വീപ് കപ്പൽ ടിക്കറ്റ് വിതരണത്തിലെ വൻ അട്ടിമറിയും പഴയ വെബ്സ്റ്റാർ പോർട്ടൽ വഴിയുള്ള രഹസ്യ വിൽപ്പനയും തെളിവുകൾ സഹിതം പുറത്തുകൊണ്ടുവന്ന സാമൂഹിക പ്രവർത്തകൻ മഹദാ ഹുസൈന് കവറത്തി പോലീസ് സമൻസ് അയച്ചു. ഭാരതീയ നാഗരിക് സുരക്ഷാ സംഹിത (BNSS) സെക്ഷൻ 94 പ്രകാരം, വീഡിയോയിലൂടെ പുറത്തുവിട്ട വിവരങ്ങളുമായി ബന്ധപ്പെട്ട രേഖകളും തെളിവുകളും ഹാജരാക്കാൻ ആവശ്യപ്പെട്ടാണ് ഇൻവെസ്റ്റിഗേഷൻ ഓഫീസർ നോട്ടീസ് നൽകിയിരിക്കുന്നത്. നോട്ടീസ് ലഭിച്ചതിനെ തുടർന്ന് തൻ്റെ പക്കലുള്ള ലഭ്യമായ എല്ലാ തെളിവുകളും ഔദ്യോഗിക ഇമെയിൽ വഴി പോലീസിന് കൈമാറിയതായി മഹ്ദാ ഹുസൈൻ വ്യക്തമാക്കി. എന്നാൽ, ലക്ഷദ്വീപ് ഭരണകൂടത്തിലെ ഉന്നത ഉദ്യോഗസ്ഥർക്ക് നേരിട്ട് പങ്കുള്ള ഈ ക്രിമിനൽ കുറ്റകൃത്യത്തിൽ നിലവിലെ പോലീസ് അന്വേഷണം കൊണ്ട് മാത്രം നീതി ലഭിക്കില്ലെന്ന ഗുരുതരമായ ആശങ്കയാണ് അദ്ദേഹം ഇപ്പോൾ പങ്കുവെക്കുന്നത്.
ടിക്കറ്റ് മാഫിയയുമായി ബന്ധപ്പെട്ട് ഇതുവരെ നടന്ന അന്വേഷണത്തിൽ സൈബർ വിംഗിൻ്റെ കാര്യക്ഷമതയും പോലീസിൻ്റെ പ്രശംസനീയമായ ഇടപെടലുകളും വ്യക്തമാണ്. കൃത്യമായ അന്വേഷണത്തിലൂടെ ഹാക്കർമാരെ കണ്ടെത്താനും അവരെ ജയിലിലേക്ക് അയക്കാനും പോലീസിന് സാധിച്ചിട്ടുണ്ട്. എന്നാൽ ഒരു സർക്കിൾ ഇൻസ്പെക്ടർ റാങ്കിലുള്ള ഉദ്യോഗസ്ഥൻ നയിക്കുന്ന നിലവിലെ പോലീസ് അന്വേഷണത്തിന് ലക്ഷദ്വീപ് അഡ്മിനിസ്ട്രേഷൻ്റെ ഉയർന്ന അധികാരശ്രേണിയിലുള്ള ഉദ്യോഗസ്ഥരിലേക്ക് നീങ്ങുന്നതിന് കടുത്ത പരിമിതികളുണ്ടെന്ന് മഹദാ ഹുസൈൻ ചൂണ്ടിക്കാണിക്കുന്നു. ഔദ്യോഗികമായി നിർത്തലാക്കിയെന്ന് പ്രഖ്യാപിച്ച പഴയ വെബ്സൈറ്റ് ബാക്ക്-എൻഡിൽ സജീവമായി നിലനിർത്തി തട്ടിപ്പ് നടത്താൻ അനുവാദം നൽകിയ ഡിപ്പാർട്ട്മെൻ്റ് തലവൻമാരിലേക്ക് അന്വേഷണം വ്യാപിപ്പിക്കാൻ പ്രാദേശിക പോലീസിന് നിയമപരവും ഭരണപരവുമായ തടസ്സങ്ങളുണ്ട്. ഉന്നതരെ തൊടാതെ താഴേത്തട്ടിലുള്ള ഹാക്കർമാരിൽ മാത്രം അന്വേഷണം ഒതുക്കിത്തീർക്കാൻ സാധ്യതയുണ്ടെന്ന ആരോപണമാണ് ദ്വീപിൽ ഇപ്പോൾ ശക്തമാകുന്നത്.
ഈ സാഹചര്യത്തിൽ, അട്ടിമറിക്ക് പിന്നിൽ പ്രവർത്തിച്ച സാധാരണ ഹാക്കർമാർ മുതൽ ഭരണകൂടത്തിൻ്റെ തലപ്പത്തിരിക്കുന്ന ഉന്നത ഉദ്യോഗസ്ഥർ വരെ ഉൾപ്പെടുന്ന മുഴുവൻ ശൃംഖലയെയും പുറത്തുകൊണ്ടുവരാൻ സ്വതന്ത്രമായ അന്വേഷണം അനിവാര്യമാണെന്ന് മഹദാ ഹുസൈൻ ആവശ്യപ്പെടുന്നു. യാതൊരുവിധ ഭരണപരമായ ഇടപെടലുകളും സമ്മർദ്ദങ്ങളുമില്ലാതെ സുതാര്യമായ അന്വേഷണം ഉറപ്പാക്കുന്നതിനായി കേരള ഹൈക്കോടതിയെ നിയമപരമായി സമീപിക്കാനാണ് അദ്ദേഹത്തിൻ്റെ തീരുമാനം. അതോടൊപ്പം തന്നെ, അന്തർസംസ്ഥാന ബന്ധങ്ങളുള്ള ഈ വലിയ ഡിജിറ്റൽ തട്ടിപ്പിൻ്റെ വ്യാപ്തി കണക്കിലെടുത്ത് കേന്ദ്ര അന്വേഷണ ഏജൻസികൾക്ക് (National Investigative Agencies) കേസ് കൈമാറണമെന്ന ആവശ്യവും അദ്ദേഹം മുന്നോട്ട് വെക്കുന്നു. സാധാരണക്കാരായ ലക്ഷദ്വീപ് ജനതയുടെ യാത്രാ അവകാശങ്ങൾ ചൂഷണം ചെയ്തവർക്കെതിരെ വിട്ടുവീഴ്ചയില്ലാത്ത നടപടി ഉണ്ടാകുന്നത് വരെ നിയമപോരാട്ടം തുടരുമെന്ന് മഹദാ ഹുസൈൻ വ്യക്തമാക്കി.
