അമിനി: ലക്ഷദ്വീപ് ഭരണകൂടം എല്ലാ ഡാക് ബംഗ്ലാവുകളിലും മദ്യവിതരണത്തിന് അനുമതി നൽകിക്കൊണ്ട് പുറപ്പെടുവിച്ച ഉത്തരവിനെതിരെ ദ്വീപിൽ പ്രതിഷേധം ശക്തമാകുന്നു. ലക്ഷദ്വീപിന്റെ സാംസ്കാരികവും മതപരവുമായ തനിമയെ തകർക്കുന്ന ഈ നീക്കത്തിൽ ശക്തമായ പ്രതിഷേധം രേഖപ്പെടുത്തിക്കൊണ്ട് എസ്.കെ.എസ്.എസ്.എഫ് (SKSSF) അമിനി യൂണിറ്റ് ലക്ഷദ്വീപ് അഡ്മിനിസ്ട്രേറ്റർക്ക് നിവേദനം സമർപ്പിച്ചു. കഴിഞ്ഞ ദിവസം അമിനി ബ്ലോക്ക് ഡെവലപ്മെന്റ് ഓഫീസർ (BDO) മുഖേനയാണ് മെമ്മോറാണ്ടം കൈമാറിയത്. ജനവാസ ദ്വീപുകളിൽ മദ്യമെത്തിക്കാനുള്ള നീക്കം സാമൂഹിക അസ്വാസ്ഥ്യങ്ങൾക്ക് കാരണമാകുമെന്നും, സമാധാനാന്തരീക്ഷം തകർക്കുന്ന ഇത്തരം നടപടികളിൽ നിന്ന് ഭരണകൂടം പിന്തിരിയണമെന്നും നിവേദനത്തിലൂടെ സംഘടന ആവശ്യപ്പെട്ടു.
പ്രതിഷേധ പരിപാടിയിൽ പ്രമുഖ മത-സാമൂഹിക നേതാക്കൾ പങ്കെടുത്തു. അമിനി ദ്വീപ് ഖാസി ഉസ്താദ് അബ്ദു റഹ്മാൻ സ്വാലിഹ് ദാരിമി, ഖതീബ് ഉസ്താദ് ഹംസക്കോയാ ദാരിമി എന്നിവർ പ്രതിഷേധത്തിന് നേതൃത്വം നൽകി. കൂടാതെ എസ്.കെ.എസ്.എസ്.എഫ് ലക്ഷദ്വീപ് ജില്ലാ പ്രസിഡന്റ് സയ്യിദ് അബൂസാലിഹ് തങ്ങൾ ഫൈസി, സ്റ്റേറ്റ് ഓർഗനൈസിങ് സെക്രട്ടറി മുഹമ്മദ് ഖാസിം ഫൈസി എന്നിവരും സന്നിഹിതരായിരുന്നു.
